Hetkara Hemserekîya Îdareyê Xoserî ya Sûrîyeya Demokratîke Emîne Osê ANFyî reyde qisey kerd û bale ante tay provakasyonan ser.

Osê serebûtê Minbîcî vistî vîrî ke wextê weçînayîşî de qewimîyabî. Osê vat: ''Rejîmê Baasî Îdareyo Xoser kerd hedef. Rejîm wazeno kurdî û erebî bidê yewbînan ro, seba ney xîret keno. Serebûtanê Minbîcî de no eşkera bi. Rejîm wazeno şarî mehf bikero. Ganî şarê ma pê nê çîyan mexapîyo. Rixmê kêmîya îmkanan Îdareyo Xoser rejîmî ra holêr xizmetê şarî keno. Baas û Rûsya bêvengîya warê mîyanneteweyî ra cesaret gênê û hêrişan kenê.

Dewleta tirke û cergê ci zî seba pêkewtişê ereb û kurdan xebatan kenê. Şarê ma heta nika yewîya xo pawite û ganî naye ra pey zî pê nê kayan mexapîyo. Ma sey Îdareyê Xoserî tim şarê xo pawit, seba şarê xo xebitîyayî. Ma proje û planê stratejîkî kerdî, berdî verê şarê xo. Rejîmê Baasî pê nê kerdişanê xo verê îşxalê dewleta tirke akerd.''

Emîne Osê ard ziwan ke Şehba û Şêxmeqsûd cayê taybetî yê û rejîmê Baasî nê cayan vera Îdareyê Xoserî xebitneno. Osê vat: ''Rejîm û Rûsya provakasyonanê xo yê Minbicî de ser nêkewtî. Nika zî înan verê xo da Şêxmeqsûd. Rejîmî waşt serebûtê 2013-2014î, serebûtêeşîra Begarî  newe ra gandar bikero. Ganî eşîra Begera û şarê ma vera nê çîyan hîsger bibê. Ma do sey Minbîcî nê meseleyan zî çareser bikerê.''