Şerwana YPJyî Delal Reqaya ke keyeyê xo reyde tewra hemleya xelisnayîşê Reqa bîye û no armancê xo ard ca îfade kerd ke înan cuya xo newe ra viste destî.

Reqa hetê DAÎŞî ra amebî îşxalkerdene û sey paytextê DAÎŞî amebî îlankerdene.17ê teşrîna verêne ya 2017î de rayberîya YPJyî de Reqa hetê hêzanê QSDyî ra ameye xelisnayene. 

Şerwana YPJyî Delal Reqa ANFyî rê qisey kerd û vat: Seba ke Reqa DAÎŞî ra bixelisna ez tewra YPJyî bîya. Reqa de vera cinî û merdiman barbarîyê pîlî ameyî kerdene. DAÎŞî reqa talan kerde, doman û cinîyî kiştî. Ez, babîyê mi, waya mi û di birayê mi ma pîya tewrê hemleya xelisnayîşê Reqa bîyî. Babîyê mi hemle de şehîd bi, şehadetê ey hêz da mi. Hemle de ez cepheyê Derîye de bîya. Uca de şerêko giran estbi. Erdê cepheyê Derîye bi gonîya embazanê ma bi hîte. 

Wextê îşxalê DAÎŞî de nê cayan rê ameyêne vatene 'Devera Cehîm'. Çunke tede barbarîya pîle ameyêne kerdene. No şaristano qedîm destê cergan ra ame xelisnayene û azadkerdene. Nika nameyê ci Devera Neîm o. Hînî tede merdimî estê û nê merdimî bi hawayêkê azadî ciwîyenê.''