Rêxistinanê cinîyan ê Rojawanî derheqê kerdişanê dewleta tirke ya îşxalkere yê Efrînî de kombîyayîşêkê çapmenîye kerd û bi taybetî venga rêxistinan ê cinîyan ê mîyanneteweyîyan da ke vera kerdişanê bêexlaqan ê serê cinîyan wurzê payan ser.

Kongreya Starî, Meclîsê Cinîyan ê Suryanîyan, Meclîsê Cinîyan ê Rojawanî, Meclîsê Cinîyan ê PYDyî, Meclîsê Cinîyan ê Îdareyê Xoserî yê Herêma Cizîrî, Yewîya Cinîyan a Suryanîyan, Buroyê Cinîyan ê Meclîsê Sûrîyeya Demokratîke, Yewîya Cinîyan ê Ereban, Buroyê Cinîyan ê Partîya Ameyoxî yê Sûrîye, Merkezê Sara û Heyetê Cinîyan ê Îdareyê Xoserî yê Rojawanî derheqê kerdişanê dewleta tirke yê Efrîn û Qamişlo de kombîyayîşêkê çapemenîye serûber kerd.

Eşkerayîya hempare ya 11 rêxistinanê cinîyan de ame parekerdene ke hêrişê dewleta tirke ya îşxalkere û ê cergan ê Efrînî yê vera cinîyan sûcê merdimîye yê. Eşkerayîye de wina ame vatene: ''Bêvengîya mîyanneteweyî ya vera îşxalê Efrînî kena ke hêrişê dewleta tirke û komanê cergan bizêdîyê. Efrîn de vurnayîşê demografî reyde, her roje merdimî yenê remnayene, merdiman rê îşkence yeno kerdene û kerdişê xirabî dewam kenê.''

Eşkerayîye de dîya zanayene ke rojanê peyênan de bi desan cinîyê kurdî hetê cergan ra ameyî remnayene û înan rê îşkence ame kerdene. 11 rêxistinanê cinîyan venga rayaumûmîya mîyanneteweyîye, rêxistinanê cinîyan û ê heqanê merdiman ê dinya da ke ver kerdişanê dewleta tirke ya îşxalkere  serê cinîyan têbigêrê.