Rêxistinanê komelê sivîlî yê Efrînî yê ke îşxalê dewleta tirke ra kampa Serdemî ya herêma Şehba de yê, bi wesîleya 1ê Êlule Roja Haştîye ya Dinya eşkerayîyêke daye. Eşkerayîye bi kurdkî û erebkî hetê Şêrîne Hesen û Avdar Eloyî ra ameye wendene.

Eşkerayîye de ame vatene ke rixmo ke Sûrîye de 10 serran ra nata şer esto hema zî dejê Sûrîye zêdîyenê. Dezgehan îfade kerd ke Rojawan de dewleta tirke û cergê ci sivîlan remnenê, kişenê û herême îşxal kenê.

Eşkerayîye de bale ameye antene tecrîdê vera Rayberê Şarê Kurdî Abdullah Ocalanî ser û ame waştene ke tecrîd cade bêro qedînayene.  Rêxistinan venga Neteweyan ê Yewbîyayeyan û rêxistinanê heqanê merdiman da ke mesuldarîya xo bîyarê ca û Rojawan de verê qirkerdişan bigêrê. Rêxistinan waşt ke seba ke roniştoxê Efrînî abigêrê ganî rayaumûmîya mîyanneteweyîye têbigêra.