Rihane Loqo rewşê Sûrîye û Rojawanî û hêrişê îşxalî yê dewleta tirke û cerganê ci ajansê ma rê ercnayî.

Rihane pare kerd ke modelê Îdareyê Xoserî bi felsefeya Jin, Jiyan, Azadî ameyo ronayene û têdûştîya cinî û camêrdan û sîstemê hemserekîye paweno. Rihane vat: ''Şorişê Rojawanî zanistê Jineolojî esas keno. Binê sîwana ney de cinîyanê Sûrîye vera ferasetê neteweperest, dîndar, cînsîperest û neteweyîyî têkoşînêko pîl kerdo. Şorişê Rojawanî sey Şorişê Cinîyan derbazê tarîxî bîyo. 

Têkoşînê cinîyan ê Sûrîye hema zî dewam keno. Nika amadekarîyê qanûnê bingeyî yê neweyî yenê kerdene. Cinîyî Sûrîye de do qanûnêkê bingeyî yê neweyî yo ke înan çin hesibneno qebul nêkerê. Ganî cinîyî qanûnê bingeyî yê neweyî awan bikerê. No seba Sûrîyeyêka demokratîke şert o.''

Rihane Loqo da zanayene ke dewleta tirke destpêkî ra nata Şorişê Rojawanî şexsê cinîyan de keno hedef û vat: ''Dewleta tirke dişmena projeyê Neteweya Demokratîke ya. Dewleta tirke xora tim cinîyan kena hedef. Rijîyayîşê rejîmê Sûrîye ra nata zî cinîyî yenê qetilkerdene û hedefkerdene. Ma kerdişanê HTŞyî nêzdî ra teqîb kenê. Awankerdişê sîstemêko ke cinîyan esas keno asan nîyo. La ganî baş bizanîyo ke ma nê sîstemî ra do tawîz nêdê.

Seba meseleyanê Sûrîye, Rojawan û cinîyan paradîgmaya Rayber Apoyî çare ya. Nika şerêko giran est o. Serkêşîya cinîyan de şerê estbîyayîşî verê cû zî amebi kerdene û DAÎŞ amebi binvistene. Ez venga pêro kesan dana ke wayîrê felsefeya Jin, Jiyan, Azadî vejîyê û dormeyê têkoşînê cuya azade de kom bibê.''