Vervatoxê Îdareyê Xoserî yê Rojawanî yê Almanya Dr. Abdulkerîm Omerî derheqê hêrişanê vera kurdan de ANFyî rê qisey kerd.

Omerî ard ziwan ke dewleta tirke 100 serrî yo xîret kena ke kurdan îmha bikera û vat: ''Dewleta tirke qet yew cayê dinya de statuyêkê kurdan qebul nêkena. Seba çinkerdişê kurdan plan û qirkerdişan kena.''

Omerî bale ante hemkarîya dewleta tirke ya bi DAÎŞî ser û vat: ''Dewleta tirke seba çinkerdişê Şorişê Rojawanî DAÎŞ şuxilna. Dewleta tirke seba qetilkerdişê kurdan û çinkerdişê destkewteyanê kurdan her çi xo rê sey firsendêkî vînena. Dewleta tirke teyna çinkerdişê kurdan wazena. Dewleta tirke seba ney dewleta Iraqî û hukmatê Başûrî de pêvînayîşan kena.''

Omerî îfade kerd ke dewleta tirke nêeşkena statu û rêxistinîya kurdan asteng bikera û vat: ''Kurdan dinya de vera terorîzmî rolêko pîl kay kerd. Cinîyê kurdî pêro dinya de şinasîyenê û rolê xo yê serkêşî anê ca. Tirkîya de sîyasetê çinkerdişê kurdan bin kewt. 25 serrî yo vera Abdullah Ocalanî tecrîd yeno caardene. Kurdan weçînayîşanê peyênan de îradeyê xo mojna û ê bîyî wayîrê destkewteyanê pîlan. Erdogan û partîya ci zî bin kewtî. Kurdî her ca de wayîrê îrade û hêzê xo vejîyenê. Dewleta tirke seba çinkerdişê ney şensê xo yê peyênî ceribnena. Nika dewleta tirke dest pê hêrişanê neweyan kerd. La a do nêeşka netîce bigêra. Kurdî do ser bikewê.''