Dima ke dewleta tirke ya îşxalkere û cerganê ci Efrîn îşxal kerd efrînijî neçare mendî ke koçê Şehba bikerê. Nînan ra yew zî Emîra Fuata 66 serre ya ke êzidîyanê Efrînî ra ya. 18ê adara 2018î de wexto ke Efrîn ame îşxalkerdene laj û birazîyê Emîra zî şehîd bîyî.

Dayîke Emîra lajê xo roja Newroze kerd binê erdî. Dima mêrdeyê ci hetê cergan ra ame remnayene û bi fîdye vera dîya. Dewleta tirke û cergan xeylêk reyî înan rê îşkence kerd. Emîra Fuat rixmê hende çîyan zî Şehba de xo ver dana û hêvî kena ke  a do rojêke abigêra Efrînî.

Emîra Fuat îşxalê Efrînî ra 10-15 rojî berî hêrişanê girana ra koçê Şehba kena. Lajê ci Fuat dima agêreno Efrîn, o û dezayê xo Evdo 18ê adara 2018î de rayîrê Cindirêsî de bi bombayan şehîd benê. Emîra seba ke cenazaya lajê xo bigêra agêrena Efrînî. Emîne cenazaya lajê xo û yê Evdo roja Newroze dewa înan Qibarî de kena binê erdî.

Emîra vana: ''Dima ke ma cenazayî defin kerdî ma kewtî rayîr. La cerganê tirkan nêverdayêne ma şorê Şehba. Ma hîrê rojan Celal Ahlam de teber de vêşan mendî. Dima ma erşawîyayî Efrîn. Cergê Siltan Mirat, Mutasim û Hamzatî dewa ma de ameybî cakerdene. Wexto ke ma agêrayî înan çeke ante ma ser vat 'Şima kafir ê, êzidî yê, ma do şima bikişê.' Mi înan rê çend ayetê Quranî wendî û wina ma xelisîyayî. Ma 3 mengî dewe de mendî.3 reyî cergan eşt keyeyê ma ser û ma îşkence dî.

Reya diyîne de cergan mêrdeyê mi remna. Ma seba ke mêrdeyê mi bivînê şîyê hetê cergan. Nê cergî tirkî qisey kerdêne. Nînan ma ra fîdyeyê qasê 3-5 hezar dolar waşt. Ez agêra Şehba, mi pere arê da û mêrdeyê mi xelisna. Reyna cergan eştêne keyeyê ma ser. Ma rê vatêne ke ma êzidî yê, kafir ê û ma rê gefî wendêne. Cergî Efrîn de barbarîye kenê. Êzidîyan rê zulm kenê. Ma wazenê wa dewleta tirke û cergî Efrînî ra şoeê. Ma wazenê abigêrê erdê xo ser.''