Tecrîdê serê Rayberê Şarê Kurdî Abdullah Ocalanî rê reaksîyonêko pîl ramojîyeno. Şorişo demokratîk o ke Rojavayijan şerê zereyê Sûrîye de viraşt sey berhemêkê fikir û mucadeleyê Ocalanî yeno vînayene.

Temsîlkara Kongreya Starî ya Mehlaya Xarbî ya Qamişlo Feryal Omere vat Mehkemaya Heqanê Merdiman a Ewropa (MHME) ya ke qalê vilakerdişê edaletî kena ganî tavilî gureyê xo bica biyaro. Omere vat: “Eke biraştî zî mehkemeya heqanê merdiman esta ganî no zulmo ke rayberê ma rê yeno kerdene wedaro.”

OCALAN BI MÎLYONAN KURDAN TEMSÎL KENO

Esnafa suryanîye Hanna Konstantîne ya Qamişloyije vat ke tecrîd ganî tavilî bêro wedartene û wina dewam kerd: “Ê kesê ke eşkenê biresê ci ganî tavilî xo biresnê Rayber Apoyî. Çunke cuya ci û azadîya ci seba ma şaranê Rojava zaf muhîm ê.”

“Tecrîd şexsê Rayber Apoyî de yeno waştene ke 50 mîlyon kurdan ser o bêro bicaardene. Planê dişmenî pê nêgirewtî çunke Rayber Apoyî fikir û felsefeya xo hemeyê rojakewtena mîyanêne de vila kerdî. Ma do heta peynî rayberîya xo dir bibê û ma do ê zîndanî ra vejê.”

GANÎ HENDÎ TIRKÎYE RA VAJÎYO VINDERE

Yusuf Tewfîk El Cumayo ke ciwanêko ereb o kedkar o Rojavayij o vat şarê erebî zî tede şarê ke rojakewtena mîyanêne de yê xeylî çîyan dendarê Ocalanî yê. Cumayî waşt ke dewletê mîyanneteweyî Tirkîye ra vajê „Vindere!“

Esnafo Qamişloyij Mahîr Yusufî zî vat ke amacê dewleta tirkî û hêzanê mîyanneteweyîyan Rayberê Şarê Kurdî Abdullah Ocalanî û şaran yewbînan ra visnayîş o.

Yusufî wina vat: “Wa mekerê xo vîr ra ke Rayber Apo yew ruh û yew beden o. Wa dewleta tirkî bizano ke ê se kenê wa bikerê do nêeşkê ma û Ocalanî yewbînan ra bivisnê.”