Dewleta tirke bi hewayêkê sîstematîkî sereyê menga teşrîna verêne ra hêrişê xo yê vera Rojawanî zêdînayî. Dewleta tirke Rojawan de sîvîlan û binesazîyan dana bombayan ver, bi hêrişanê îşxalî qirkerdiş kena. Hukmatê tirke narey eşkera îlan kerd ke ê sûcê şerî do bikerê. Wezîrê Karanê Teberî Hakan Fîdanî eşkera vat ê  do heme binesazîyan û seresazîyan, tesîsanê enerjî hedef bîgêrê.

Nê pancşeme bi taybetî herêma Cizîre de hêrişî zêdîyayî. Saetanê serê sibayî ra xeylêk warî dîyayî bombayan ver. Mîyanê nê cayan de awbend, santralê elektrîkî, îstasyonê petrolî, îstasyonê awe, kampa macîran, dewe û wesayîtê sîvîlî est ê.

Taxa Meysenunî ya Qamişloyî de santralê elektrîkî û dewa Sêgirka dîyayî bombayan ver. Îstasyon de şewat vejîya.

Teyaranê şerî Hesekê da bombayan ver, deweka Mişrefe Hime de 4 dewijî birîndar bîyî ke rewşa di kesan giran a. Nameyê birîndaran wina yê: Elî Hemo Naso (70), Beşîr Îsa Hemîd (49), Ebdulezîz El Mihemed û  Ednan Behro Ebdullah.

Dima ra dormeyê Kampa Waşûkanî dîyayî bombayan ver. Na kampe hetê Îdareyê Xoserî ra semedê kesanê ke rîyê îşxalê Serêkanîyê bizor erdê xo ra bîyî, amebî ronayene û verî zî çend rey raştê bombardumanî amebî.

Dewa Tewile ya Til Temirî zî hetê droneyê çekdarî yê dewleta tirke ra dîyayî bombayan ver.

Qezaya Til Temirî de mabênê dewanê Ruguba û Ebû Naqa droneyo çekdar ê dewleta tirk yo bi nameyê bayraktarî dîya war.

Dewa Şêwarxa ya qezaya Şera ya Efrînî de droneyê kamikaze yê dewleta tirke dîya war û ame bêtesîrkerdene.

Dewa Til Hebeşî ya Amûdê zî dîyayî bombayan ver. Goreyê zanayîşanê verênen kes/kesan dinyaya xo bedilnaye û birîdarî est ê.

Dewa Rekbe ya Til Temirî  ya ke tede îstasyonê awe est ê, dîyaye bombayan ver. Hêriş de îstasyonan de xesaro madî vejîya werte.

Kobanê de dewa Qesifî ya qezaya Sirînî pê teyaranê şerî dîyaye bombayan ver. Reyna nêzdîyê dewa Xirab Eşkî de motosîkletêk bi  hedefê droneyê çekdarî. Derheqê hêrişî de zanayîş nêame girewtene.

Dewleta tirke bi droneyêkî dewa Girdaholî ya Tirbesipiyê de îstasyonêk da bombayan ver. Reyna îstasyonê pertrolî yê Seide  û îstasyonê petrolî yê Zerba zî dîyayî bombayan ver. Xesar nêame tesbîtkerdnene.

Reyna qezaya Çilaxa ya Qamişloyî zî dîyayî bombayan ver la derheqê netîceya hêrişî de zanayîş nêame girewtene.