Bajaranê Kobanê, Tebqa û Qamişlo yê Rojawanê Kurdîstanî de bi wesîleya serrgêra Şorişê Rojawanî yê 19ê Temmuze şar vejîya kuçeyan û şoriş pîroz kerd.

Kobane de merasîmêko xurt ame kerdene. Bi seyan kesanê ke Meydanê Şehîd Egîdî ameyî têhet serra 10. ya şorişî pîroz kerde. Temsîlkarê Îdareyê Xoserî yê Efrînî û Îdareyê Sîvîlî yê Minbicî zî tewrê ci bîyî.

Şayîya ke bi rêzgirewtişî dest pêkerde de verî Endamê Koordînasyonê Kongraya Starî ya Fratî Macîde Heson qisey kerd. Hesone verî şoriş pîroz kerd û vist vîrî ke cinîyî pê nê şorişê tarîxî kewtî merhaleyêka newîye.

Hesone vat: ''Ma ewro bi seyan kesan merkezê xoverdayîşî Kobanê de ameyî têhet. Ma do vera dewleta tirke ya ke semedê çînkerdişê neteweya demokratîke hêriş kena  têkoşînî pîlêr bikerê. Ganî şarê herême vera îşxalkeran bibo yew.''

Hemserekê Komîteya Karanê Sosyalan  Farûq El Maşî zî vat: ''19ê Temmuze şorişê şaran o. Ma do rêçê şehîdanî de nê şorişî bipawê.''

Fermandaranê YPJyî ra Dîndare Xelefa ke  bi nameyê QSDyî qisey kerd, vat:  ''Şaranê ke şoriş kerd eşkera mesaj da dişmenî ke ê do destûrê îşxalî nêdê. Ma zî seba ke destkewteyanê xo bizêdnê, ma do  têkoşînî rê dewam bikerê.''

Badê qiseykerdişan pê deyîran û govende  şayîye qedîyaye.

Reyna Tebqa û qezayanê Girkê Lagê û Amûdê yê Qamişloyî de zî bi aktîvîteyan şoriş ame pîrozkerdene. Aktîvîteyan de şehîdê şorişî ameyî yadkerdene û ame vatene ke ê do wayîrê destkewteyanê xo bivijîyê û şorişî bipawê.