Rojawanê Kurdîstanî yo ke binê hêrişê dewleta tirke û çeteyanê ci de yo hêrişê îşxalkeran û xoverdayîşê şar û şerwananê herême dewam keno.

Sivîlan ser o bombayî varnayî

Dewleta tirke ya îşxalkere û çeteyanê ci hêrişê dewanê Meranaz, Malîkîyê û Şiwarxa yê qezaya Şera ya Efrînî û dewa Semûqa ya Şehba û Awbendê Şehba ser o bombayî varnayî.

Efrîn de teqayîş

Hetê bînî ra rayîrê Raco yê Efrînî yo ke binê îşxalê dewleta tirke de yo teqayîşêk ame meydan. Goreyê zanayîşanê verînan merde û birîndarî estê.

Çeteyî kewtî têmîyan

Reyna têmîyankewtişê mabênê çeteyan zî dewam keno. Efrîn de mabênê cerganê dewlete de pêkewtiş qewimîya. Saetanê şewe de mabênê cerganê Sultan Muradî û Lîwa Şîmalî de reyna pêkewtiş qewimîya.

Ame parekerdene ke semedo ke cergan waşt ke noqtayêke de serwerîya xo bidê mojnayene pêkewtiş qewimîya. Dîya zanayene ke heta nika koma Lîwa Şîmalî ra kesêk birîndar bi. Hemwelatîyanê sivîlan pêkewtişî ra dikanê xo girewtî û warê serebûtî ra dûrî kewtî.

Bab de şewat

Bad de zî îşxalkerdan erazîyê şarê sivîlî eşt adir ver. Şerwananê Meclîsê Leşkerî yê Babî û citkaran seba ke kila mereso hêgayanê bînan mudaxaleyê şewatî kerd û adir kerd hewna. Dewa Şêx Nasirî ke tede şewat vejîya herêma ke çeteyî tede ameyî cakerdene de ya. Citkaran da zanayene ke dewe de gozêre, zeytunêrî û hêgayê xeleyî estê.