Rojawan de ciwanî vera îşxalî vejîyayî kuçeyan

Rojawan de ciwanan hêrişê îşxalî yê dewleta tirke  yê vera Başûrê Kurdîstanî pê çalakîyan protesto kerd.

Bajaranê Şehba, Girkê Legê, Qamişlo, Kobanê, Minbic û Tirbesipîyê yê Rojawanî de ciwanî vera îşxalê dewleta tirke yê vera Herêmanê Pawitişî yê Medya vejîyayî kuçeyan. Ciwanan Hemleya Bazanê Zagrosî selam kerd û hêrişê îşxalî protesto kerdî.

Kantonê Şehba de endamanê Têgêrayîşê Ciwanîyê yê Şorişgêran çalakîyêke organîze kerde. Çalakîya ke qezaya Fafînî de ameye kerdene xeylêk kesî tewrê ci bîyî. Verî rayraşîyayîşêk ame kerdene dima ra eşkerayîye ameye dayene. Eşkerayîye de nê ameyî vatene: ''Dewleta tirke bi des serran o cehd kena ke herra Kurdîstanî îşxal bikero û vera kurdan qirkerdişan kena.PKKyî serêkşîya Rayber Apo yî de xoverdayîşêk da destpêkerdene. Dewleta tirke nika seba ke xîyalê xo yê Osmanîye bîyaro ca hêrişê Herêmanê Pawitişî yê Medya kena. Wazenê ke Têgêrayîşê Azadîye yê Kurdîstanî tesfîye bikerê. Dewleta tirke ya ke Garê de bin kewte nika hêrişê Metîna, Zap û Avaşînî kena. Hukmatê Bexdad û Hewlêrî zî nê hêrişan rê benê hempar. PDK bi xo mîyanê nê hêrişan de yo. La gerîlayî cewabê hêrişan danê. Ganî heme ciwanî wayîrê nê xoverdayîşî vejîyê.''

Reyna Girkê Legê, Qamişlo, Kobanê, Minbic û Tirbesipîyê de zî ciwanî bi eynî waştişî vejîyayî kuçeyan rayraşîyîşê meşaleyinî kerdî. Çalakîyan de bale ameye antene xoverdayîşê tarîxîyî yê gerîlayan ser û veng dîya ciwanan ke wa nê şerê anorî de cayê xo bigîrê. Ciwanan Hemleya Bazanê Zagrosî selam kerd û vat û îşxalkerî sey Garê do reyna bin bikewê.