Rojawan de nêweşîya kanserê çijeyî bîye zêde. Cinîyanê Rojawanî yê ke nêweşê kanserê çijeyî yê seba ke merkezê weşkerdişî tay bîyî û hacetê hewcedarî çinêbî zaf zehmetîye antêne. Heyva Sor a Kurdîstanî 1ê teşrîna verêne de seba ke kanserê çijeyî rew bêro teşhîskerdene û weşkerdene merkezêkê weşîye saz kerd.

Merkez Rojawan de merkezê kanserê çijeyî yo verên o. Pêro nêweşî eşkenê bêpereyan merkez ra îstîfade bikê. Merkez de hacetê teknolojîkî û hacetê mamografî yenê xebitnayene ke nê hacetî seba teşhîskerdişê kanserê çijeyî zaf girîng ê. Merkez de 3 odayî estî û 6 cinîyê pisporî xebitîyenê. Pêro doktorê merkezî zî pisporan ra yenê meydan û merkez de derheqê kanserê çijeyî de zanayîşî zî yenê dayene.

Mudira Merkezê Weşîye Rojda Emîn Silêman vat: "Seba kanserê çijeyî teşhîso rew zaf girîng o. Ganî cinîyî bi nizamî bêrê muayenekerdişî. Yan zî keye de xo bi xo muayene bikê. Ganî cinîyî tim û tim spor bikê, no seba weşîye zaf girîng a."

Pispora nêweşîyanê zereyî Fatme Abdullah îfade kerd ke ê do tim merkez de derheqê nêweşîyan de zanayîşan danê cinîyan. Fatme ard ziwan ke zanayîşdayîşê înan ra dima cinîyî hîna eşkenê ke xo bi xo nêweşîyanê xo teşhîs bikê. Fatme vat ke ganî cinîyî seba rewşa xo ya weşîye hîsgerîye bibê.

Verê cû zî Qamişlo de Nêweşxaneyê Çim û Zerrîye amebi akerdene.