Seranserê Rojawanî de bi rojan o adirê azadîye yê Newroze yeno tavistene. Ewro Qamişlo, Reqa, Hesekê û Kobanê de Newroze bi coşê pîlî ameyî pîrozkerdene û azadîya Rayberê Şarê Kurdî Abdullah Ocalanî ameye waştene.

Newroza Qamişloyî de Enama Konseya Serekîye ya PYDyî Foza Yûsif qisey kerd. Yûsife ard ziwan ke înan semedê caardişê projeyê netewa demokratîke kerdo xo çeng û vat: ''Rayber Apo 50 serrî yo semedê ma têkoşîn keno. Sîstemê Îmraliyî vera heme şaran o. Ma do bi Newroza emserî nê sîstemî bişiknê, waranê îşxalkeran bikerê azad.''

Foza Yûsif  veng da heme partîyanê kurdan ke semedê xeripnayîşê Pêkerdişê Lozanî wa têkoşînê hemparî bikerê.

Hesekê de şarî vera hêrişanê îşxalî  û  tecrîdê Îmraliyî hêrsê xo ard ziwan û vat ê do bi hewayêkê qerardarî têkoşînê xo bidomnê û tewr peynî de vera îşxalkeran ser bikewê.

Kobanê de zî bi hezaran kesê ke tewrê şayîya Newroze bîye, vat ê do bi ruhê xoverdayîşî yê Newroze verê îşxal û qirkerdişan bigêrê.

Reqa de şaro ke warê Newroze de ame pêser vat do semedê azadîya fîzîkîye ya Abdullah Ocalanî têkoşîn bêro xurtkerdene.