Xeylêk  merkezanê Rojawanê Kurdîstanî de rojbîyayîşê Rayberê Şarê Kurdî Abdullah Ocalanî ame fîrazkerdene.

Meclîsê Keyeyanê Şehîdan ê Herêma Firatî seba domanan şayîyêke viraşte. Domanan seba şehîdan findî tavistî û qisey kerd. Şayîye de hunermend Xelîl Can vejîya sehne ser.

Eyn Îsa de roniştoxanê qeza û koçberanê Girê Sipî bi wesîleya 4ê Nîsane Parka Jinê de leyî ronayî. Qezayanê Cirin, Silûk û Hîşeyê yê Girê Sipî de zî leyî ronîyayî.

Minbic de bi wesîleya 4ê Nîsane Festîvala Diyîne ya Domananê Azadan ameye kerdene û fotografanê Rayberê Şarê Kurdî ra pêramotişêk ame akerdene. Şayîye de Koma Rojda û Koma Rebîh El Furat deyîrî vatî û Koma Şîlan a Kobanê zî govende girewte. Dima Minbic de zî leyî ronîyayî.

Zirgan de derheqê cuya Abdullah Ocalanî de semînerêk ame dayene. Semîner sînevîzyonêk ame mojnayene.

Qamişlo de serkêşîya PYDyî de Baxçeyê 4ê Nîsane bi merasîmêkî ame akerdene. Baxçe de leyî ronîyayî û fotografê Rayberê Şarê Kurdî ameyî akerdene. Baxçe de fotografê Rayberê Şarê Kurdî Abdullah Ocalanî zî beşdaran rê ameyî vilakerdene.