Rojawanê Kurdîstanî de termînê perwerde û banderîye 4 hezar û 700 dibistanan de bi 878 hezar wendekaran dest pêkerd. Hêrişanê dewleta tirke ya îşxalkere ra xeylêk wendekarî zî heqê perwerde û banderîye ra bêpar mendî.

 Dibistanan de dersê kurdkî, erebkî û sûryankî dîyenê. Emser dersê îslam û êzidîtîye zî îlaweyê mufredatî ameyî kerdene.  

Hemserekê Heyetê Perwerde û Banderîye yê Îdareyê Xoserî yê Rojawanî Rohat Salih Xelîlî da zanayene ke vera perwerde û banderîye astengîya tewr pîle hêrişê dewleta tirke yê. Xelîlî pare kerd ke rixmê ney zî înan amadekarîyê xo safî kerdê û termîn dayo destpêkerdene.  

 Xelîlî dîyar kerd ke dibistanan de wendekarî bi ziwanê xo yê dayîke perwerde gênê û dibistananê amadekarîye de zî perwerdeyê mîmarî, weşîye, zîret û bazirganîye dîyenê.  

Xelîlî ard ziwan ke 2014 ra nata Rojawan de bi hawayêkê sîstematîkî  perwerde dîyeno û vat: ''Ma wendekaran reyde perwerde danê mamostayanê xo zî.  Mufredatê ma de dersê sey tarîx, fîzîk, jineolojî, matematîk, kîmya, dîn, zanistê komelî, îngilîzkî, kurdkî erebkî, muzîk, resim ûsn est ê.''

Xelîlî bale ante ser ke dibistanan de malzemeyê dersan, heta ge ge awe û ceyran zî çin ê. Xelîlî pê hesna ke hêrişanê dewleta tirke ya îşxalkere ra wendekarî dersan ra apey manenê û vat: ''Seba ma meseleya tewr pîle hêrişê Tirkîya yê. Herêmanê îşxalkerdeyan de dibistanî bîyê baregehê MÎT û dewleta tirke. Seba ke wendekarî perwerde ra bêpar nêmanê destê ma ra çi yeno ma kenê. Kampanê Serêkanîyê, Waşokanî û Newroze de zî wendekarî est ê. Ma nê wendekaran gênê û benê dibistanan. Wendekarî zî rixmê pêro zehmetîyan zî dersanê xo de eleqedar benê û giranîye danê perwerdeyî ser.''