Şaristanê Dirbesîye de qasê 320 dewî estî. Beşêkê nînan zî sînor ser o yo. Dewanê ke benê hedefê hêrişanê Dewleta Tirkan, înan ra yew zî Şerîka ya. Roniştoxanê dewe vat ke ê bi hêzanê QSDyî bawer ê. 

Roniştoxanê Şerîka ra Ahmed Yûsifî vat: "QSDyî sînorê ma pawitêne û ma pê cuya xo kêfweş bîy.  Serebûtan ra dima Serêkanîye de hêzê Rejîmê Sûrîye sey asayîşê sînorî amebî. Ma wazenê sînorê ma QSD bipawo. O çax cuya ma hîna biasayîş bena."

Ferhad Abdoyî vat: "Ma wazenê QSD ma bipawo ke hêzê şarê ma yo. Hewceyê ma ne bi Rûsan ne zî bi rejîmî esto. Ma vizêr dî ke rejîmî senî cepheyî ca verdayî û remeyî. QSDyî ra ber hêzêk nêeşkeno erdê ma bipawo. Çunke QSD wareameyîşê na herême yo."