Roniştoxê Kampa Vegerî: Ma do heta serkewtişî xo ver bidê

Roniştoxê Kampa Vegerî yê Şêrawa kerdişanê îşxalkeran ra nêxelisîyayî. Roniştoxan ard ziwan ke ê do heta ke dew û wareyê xo bixelisnê xoverdayîşê xo rê dewam bikerê.

Îşxalê Efrînî ra dima şarê Şehba û Şêrawa neçare mend ke koç bikero. Îdareyê Xoserî peynîya 2018î de kampa Vegerî viraşte û şaro koçber tede ca kerd. Kampe de 105 keyeyî manenê. Roniştoxê Kampa Vegerî yê Şêrawa kerdişanê îşxalkeran ra nêxelisîyayî. Roniştoxan derheqê xoverdayîşê xo de ANFyî rê qisey kerd.

Cinîya efrînije Gulê Elo Beko dewa Beradî ya Şêrawa ra koç kerd. Gulê vat: ''Bombardumananê dewleta tirke de ma neçare mendî ke koç bikerê. Ma nika xeyman de manenê la reyna zî benê hedefê înan. Ma heta ke dew û wareyê xo bixelisnê xoverdayîşê xo rê dewam bikerê.''

Endama Temsîlkarîya Avûkatan a herêma Efrînî avûkate Lezgîne Kor vat: ''Dewleta tirke pê nê bombardumanan armanc kena ke şar bi temamî koç bikero. Hêrişê vera sivîlan pêro huqûqan de cînayet ê. Goreyê Peymana Cenevre ganî dewleta tirke hêrişê sivîlan nêkera. La dewleta tirke û cergê ci pêro peymanan binpay kenê. Kerdişê vera Efrînî û kampa Vegerî verê çiman de yê. Neteweyê Yewbîyayeyî zî pê bêvengîya xo hemkarê dewleta tirke benê.''