Yewîya Roşinvîran a Efrînî ke serra 2016î de ameyebî ronayene, Kampa Serdemî ya Şehba de xebatanê xo rê dewam kena.

Hemsereka Yewîya Roşinvîran a Efrînî Usema Ahmede vat ke seba xoverdayîşî biresnê ameyoxî mucadele kenê. Ahmeda ke şaîr û krîtîkkerdoxe ya wina vat: “Ma zî pîya bi şarê xo ravêrtî bi Şehba. Di mengî merkezê ma çinbi. Ma şarî mîyan de xebatê xo domnayî, dima ra merkezê xo zî awan kerd. Ma wazenê ke arşîvê şehîdan virazê, hetê edebîyat, tarîx û sînema ra havilan şarê xo rê bikerê. Bi nê hawayî ma xo mîyan de kar pare kerd. Beşê tarîxî de do Abdullah Şîkakî, beşê sînema de zî Heysem Mistefa û Mehdî Erselan do ca bigîrê.”

XEBATÊ KE AMEYÊ KERDENE

Ahemede vat xusûsen ê seba averşîyayîşê Kurdkî xebetênê û mîyanê ciwanan de zî eleqedarîya seba Kurdkî hîna bîya vêşî. Ahmede wina dewam kerd: “Ma çarçiwaya xebatan de xebata perwerdeyê nûştişê hîkayeyan bi 17 wendekaran dir daye destpêkerdene. Çar mengî yê ke dewam kena. Dimayê perwerdeyê nûştişê hîkayeyan ra zî ma perwerdeyê nûştişê senaryoyan da destpêkerdene. Yew zî xebata ma ya hîkayeyanê kesanê ke xoverdayîşê çaxî de şehîd kewtê esta.”

Xelîlo ke domanêko Efrînij o 13 serre vo û wendekarê sinifa 8. yo her roje tewrê perwerdeyê  seneryo beno. Rixmê emrê xo yê qicî zî hayîya ci çîyanê ke ameyê ciwîyayene ra esta. Xelîl wina vano: “Gama ma Efrîn ra vejîyayî ma zaf kewtî ver. Na yewe ra ma tîya hîsanê xo nûsenê. Ez şîîran nûsena. Babeta heme şîîranê mi Efrîn o.”

Selam Îboyo ke tewrê xebatanê tîyatroyî beno vat ke Şehba zî rîpelêkê xoverdayîşî ya. Dengbêj-nûştox Mihemmed Welîdî zî vat xo averberdiş perçeyêkê xoverdayîşî yo.

Endama Yewîya Roşinvîran Avesta Îbrahîma ke mesuldarê kitabxaneyê Kampa Serdemî ya vat: “No kitabxaneyê Kampa Serdemî dinya de warê xo de yo yewin o. çunke heta nika kampanê multecîyan de kitabxaneyî nêameyê awankerdene. No kitabxane şertanê zaf zehmetan de ame awankerdene.”

Yewîya Roşinvîran ra resam Îbrahîm Erdelan zî kargehê resimî de tabloyanê Efrînî xêz keno. Îbrahîmî ard ziwan ke rixmê heme şertanê zehmetan û hêrişan de zî o do bi tabloyanê xo xoverdayîş û mucadeleyê şarê xo qal bikero.