Tesîrê kişîyayîşê leşkeranê tirkanê ke seba îşxalê Îdlîbî erşawîyayî dewam keno. Rûsya îfade kerd ke ''Ganî leşkerê tirkî a herême de nêbibîyêne'' NATO zî bi vengdayîşê dewleta tirke yeno pêser.

Başûrê Îdlîbî de vizêr nêmroje ra dima artêşa tirke û cerganê ci vera rejîmê Sûrîye dest pê hêrişêkî kerd. Tayarayanê Rûsya û Sûrîye zî herême ser o bombayî varnayî û xeylêk leşkerê tirkî ameyî kiştene.

Goreyê zanayîşan Cebel Zawîye, Zakum û Sehl El Gab de mabênê hûmara 79 û 113î de leşkerê tirkî merdî û xeylêk leşkerî zî birîndar bîyî.

La goreyê selahîyetdaranê dewleta tirke 33 leşkerî merdî. Reya verêne Serekkomar Recep Tayyîp Erdogan hûmara mergan eşkera kerde û vat ke 3 leşkerî merdî. Walîyî dima eşkerayîyêka diyîne weşanaye û vat ke hûmara 22 ya, labelê nêmeyê şewe de reya hîreyîne eşkerayîye daye û pare kerd ke hûmara kişteyan bîye 29. Walîyî tewr peyêne vat ke hûmara kişteyan 33 a.

Hetê bînî ra Tirkîya de medyaya komelkîye seba ke merdimî zanayîşan nêgêrê ameye astengkerdene.

Hêrişî ra dima Erdoganî qesra xo de Kombîyayîşê Asayîşî kerd ke 6 saetî dewam kerd. Kombîyayîşî ra dima eşkerayîyêke nêameye kerdene.

Vengdayîşê seba NATOyî

Selahîyedaranê dewleta tirke hêrişê Îdlîbî ra dima venga NATOyî û DYA da û ard ziwan ke ganî no hêriş wina bêro hesibnayene ke vera NATOyî zî ame kerdene. Selahîyetdaranê dewleta tirke heman wextî de da zanayene ke berê sînorî seba şîyayîşê Ewropa multecîyan ra akerde yê.

NATO waştişê Tirkîya ser o ewro seba pêkewtişanê Îdlîbî do kom bibo. Sekreterê Pêroyî yê NATOyî Jens Stoltenbergî eşkera kerd ke ê do bi vengdayîşê Tirkîya kombîyayîşê rewşa lezabeze bikerê.

Eşkerayîya Rûsya: Ganî uca de nêbibîyêne

Wezaretê Pawitişî yê Rûsya derheqê serebûtê Îdlîbî de eşkerayîye kerd û vat: ''Leşkerê tirkî ganî a herême de nêbibîyêne. Milîtananê Îdlîbî reyde leşkerê tirkî zî ameyî pirodayene. Artêşa Rûsya derheqê serebûtî de gamêke eşte ke artêşa Sûrîye adirbirnayîş bikera. Hêriş hetê hêzanê Rûsya ra nêame kerdene.''

NY reyna biqesawet ê

Sekreterê Pêroyî yê Neteweyanê Yewbîyayeyan Antonio Goterresî derheqê hêrişî de eşkerayîyêke daye û vat ê zaf biqesawet ê.

DYA: S-400an ra fek vera bide

Wezaretê Karanê Teberî yê DYA eşkerayîyêka nuştekîye de vat: ''Ma mutefîkê xo yê NATOyî Tirkîya reyde yê.  Ma ci gêrenê ke nê krîzî de ma senî bieşkê paştî bidê Tirkîya.''

Sersefîrê NATOyî yê DYA Kay Bailey Hutchisonî zî vizêr şan eşkerayîya xo de vat: ''Ganî Tirkîya baş bivîna ke kam yar o kam neyarê ci yo. '' Hutchisonî venga Erdoganî da ke S-400an ra fek vera bido.