Endamê Konseya Rayberdişî ya KCKyî Sabrî Okî Bernameyê Taybetî yê Stêrk TVyî de rojdem erjna.  Qiseykerdişê Okî ra qismêk wina yo:

''2024 de tecrîdê giranî yê vera Rayber Apoyî dewam kerd û Rayber Apoyî vera nê têkoşîno xurt da. Dewleta tirke bi heme îmkananê xo hêrişê şarê kurdî û têgêrayîşê ma kerd. Dişmenî vera şarê ma û gerîlayanê azadîye yê Kurdîstanî çeko qedexe zî tede heme hêrişê xo yê wehşîyî kerdî la rixmê nê netîce nêgirewt. Gerîlayî bi ruhê Asya û Rojgeran heme waran de xover da û qet gamêke peyser nêeşte.  2024 de dişmenî netîce nêgirewt. Îmrali de zî rixmê heme zext û îşkenceyanê xo yê Rayber Apoyî netîce nêgirewt. Bi Hemleya Azadîye paradîgmaya Rayber Apoyî heme dinya ra vila bîye.

Nika zîndananê Kurdîstan û Tirkîya de bi hezaran sîyasetmedarê kurdî, welatperwerî û kadroyê PKKyî zîndan de yê. Heyetê DEM Partî şi Îmrali. Zîyaretê wekîlan ê Îmraliyî zaf muhîm û bimana yo. Rayber Apoyî heta ewro xeylê reyî adirbirnayîş kerd û semedê haştîye zaf gamê girdî eştî la zîhnîyetê îşxalkerî tim bi hêrişan cewabê waştişê haştîye da. 

Ewro reyna nê munaqeşeyî yenê kerdene. Mesajê ke Rayber Apo ewro dano zaf muhîm û tarîxî yê. Semedê ameyoxê Tirkîya û şarê kurdî bimana yê. Her kesî rê mesajêk est o, her kes eşkeno rolê xo bîyaro ca. Rayber Apo xora bi serran o vano û hazir o ke semedê demokratîkbîyayîşê Tirkîya û çareserkerdişê meseleya kurdan berpirsîyarîye bigîro.  Tewirê têgêrayîş û şarê ma zelal o, bêşik muxatap tim Rayber Apo yo.

Meseleya bîne ganî çew xo rehet veramedo. Ganî ma hêzê xo rê bawer bikerê. Xora eke wina nêbênî dewleta tirk heyet nêşawitêne Îmraliyî. Dewleta tirke bêçare mend. Têkoşîn çend bibo gird ma hende netîce genê. Rayber Apo do dahîna hole rolê xo kay bikero. Prosesêko tarîxî yeno ciwîyayene. Heta meseleya kurdan çareser nêbo Rojhelatê Mîyanênî nêeşkeno bibo demokratîk.

Hêzanê îşxalkeran 100 serrî verî kurdî xapînayî û destûr nêda bibê wayîrê statuyî.  Seba ke o wext kurdî yew nêbîyî û pîya têkoşîn nêkerd, ser nêkewtî. Ewro rewşe cîya ya. Propagandaya 50 serran a Rayber Apoyî est . Çar parçeyanê Kurdîstanî de rêxistinê ke kede danê est ê.  Ganî helêke cuwa ver ruh û îradeyo neteweyî bêro ramojnayene. Serra newî de ganî azadîya fîzîkîye ya Rayber Apoyî bêro caardene. Badê seserran semedê kurdan averşîyayîşê muhumî ciwîyenê û ganî nînan bi giranî bigîrê dest. Ma çend têkoşîn bikerê, xover bidê ma hende netîce genê.''