Fermandaranê YPJyî ra Rohilate Efrîn têkoşînê YPJyî têkoşînê 2024î ANFyî rê ercnayî.

Qiseykerdişê Rohilate Efrîn ra tayê noqtayê girîngî wina yê:

''YPJ hêz û vengê xoverdayîşê pêro cinîyan o. Vera qirkerdişê serê cinîyan YPJ zî tim têkoşînê xo xurtêr keno. YPJyî 2024 de cera DAÎŞî û îşxalkeran xoverdayîşêko pîl kerd. Emser zî xeylê konferans û kombîyayîşî ameyî kerdene. Nê xebatan reyde girîngîya cuye ya rêxistinbîyayîşê hemparî zêdîyaye. 2024 de zî ame dîyene ke cinîyî hewceyê rêxistinbîyayîş û xopawitişî yê.

 Cinîyî seba pawitişê xo û pawitişê estbîyayîşî ganî rêxistinîye aver berê. 2024 de zî YPJyî mojna ke ê hêzê pawitişî yê pêro cinîyanê dinya yê. YPJyî 2024 de xo resnayo xeylê cinîyanê dinya û mesajê xo dayo nînan. 

2024 de rejîmê Sûrîye rijîya. A raşt mumkîn nîyo ke rejîmêk mîyanê 12 rojan de birijîyo. Oyo ke bîyo mudaxeleyêko mîyanneteweyî bi. Naye reyde dewleta tirke ancî planê xo yê serê Împaratorîya Osmanîyan vistê dewre. Rojawan parçeyêkê Sûrîye yo. Ganî şrê Sûrîye xo îdare bikerê û qet yew hêz mudaxele nêkero. Nêbeno le dewleta tirke erdê Sûrîye de biba wayîra plan û projeyêkî. Tirkîya Sûrîye de îşxalker a. Modelê Îdareyê Xoserî seba şaranê Sûrîye modelêko tewr raşt o. 

Ganî Sûrîyeya newîye de no bêro esaskerdene. Sûrîye de vurîyayîşê lezgînî est ê. Vera destkewteyanê şaran hêrişî yenê kerdene. Dewleta tirke kena ke Îdareyê Xoserî çin bikera. Nê wextî de xoverdayîşê ke Awbendê Tişrîn û Qereqozax de yenê kerdene  do rengê xoverdayîşê dewrê neweyî eşkera bikerê. Şerwanê YPG û YPJyî bêters hê xo ver danê. Armancê şerwanan pawitişê destkewteyan o. 

Tişrîn de rûmetê şarî ho pawîyeno. Ez pêro şerwanan rê bi na wesîle serkewtiş wazena. Şerwanî do hertim cewabê hêrişan bidê.''