Şorişê Rojawanî kewt serra 9. Şorişî berê xo xeylêk rojnameger, hunermend û tarîxnasan ra akerdî. Nê rojnamegeran ra yew zî Bêrîtan Sarya ya. Bêrîtane ma rê Şorişê Rojawanî ser o qisey kerd.

Bêrîtan Sarya sibat-adara 2016î de şîye Rojawan. Bêrîtane qala sîstemê xoîdarekerdişê Rojawanî kerde.

Bêrîtan Sarya vist vîrî ke welatan de ke tede Wisarê Ereban qewimîya, ya wayûbiratîya misilmanan îqtîdar de tı û sîstemêko pederşahî, dînperest serdest o yan zî şerêkê zereyî esto. Bêrîtane eşkera kerd ke hêzê herême bi taybetî Tirkîya nê şeran xorinêr kenê.

Bêrîtane vat: ''La Şorişê Rojawanî de rewş wina nêbi. Rojawan de yewîya şaran û îdareyêko hempar ame awankerdene. Îdareyê Xoserî de dina pêro şarî temsîl benê, kotaya pêroyînan esta. Pêro konser û komunan de îradeyê cinîyan, îradeyê komelî û şaran esto. Kotaya cinîyan se ra panc a. Sîstemê hemserekîye esto. Rojhelatê Mîyanênî de Îdareyo Xoser modelêko verên o. Xeylêk herêmî DAÎŞî ra ameyî pakkerdene ke şaranê nê herêman zî Îdareyo Xoser tercîh kerd û êlula 2018î de Îdareyo Xoser 7 herêman ra ame awankerdene.

Dewleta tirke serra 2018î de Efrîn û serra 2019î de zî Serêkanîyê û Girê Sipî îşxal kerdî. Rixmê nê hêrişan zî sîstemêko model esto. Eke nê şer û hêrişî biqedê eke statuyê Îdareyê Xoserîya Demokratîke yê Rojawanî bêro qebulkerdene averşîyayîşê pîlî do biqewimîyê. Ronesansêko pîl do bêro caardene.

Rixmo ke QSDyî DAÎŞ nê erdî ra pak kerd statuyê ci nêno naskerdene. Hêzê mîyanneteweyî seba ke Sûrîye de çareserîye nêwazenê na babete ra dûrî vindenê. Nê pêro zî benê sebeb ke hêrişê DAÎŞ û Tirkîya bizêdîyê. Rixmo ke DAÎŞ erdî ser o qedîya hêrişanê xo dewam keno. Vera cerganê înan Dêra Zorê de operasyonî yenê kerdene. La nê operasyonî qîm nêkenê.

Çunke peyê DAÎŞî de Tirkîya esta. Tirkîya cergan rêxistin kena. Cergî vanê ke MÎT înan reyde xebitîyeno. Heta ke vera Tirkîya tewirêko zelal nêro mojnayene û heta ke statuyê Îdareyê Xoserî nêro qebulkerdene DAÎŞ Sûrîye de nêqedîyeno.

Iraq de zî nêqedîyo. Erdogan sey serekê DAÎŞî têgêreno. Goreyê dokumentanê ma serekê DAÎŞî Ebû Mûhammed El Mevla El Selbî Tirkîya de yo. Eke hêzê mîyanneteweyî raşta zî wazenê meseleya Sûrîye çareser bikerê wa Tirkîya rê teda bikerê. Her orje cergê Tirkîya qirkerdiş, remnayîş, tecawuz kenê. ''

Rojnamegere Bêrîtane derheqê hêrişanê dewleta tirke yê vera Başûr û Rojawanê Kurdîstanî de zî nê çîyî vatî: ''Goreyê zanayîşanê ma Eyn Îsa de amadekarîya hêrişî estbî û na amadekarîye qedîyaye. Pê îşxalê Eyn Îsa û rojhelatê Kobanê wazenê hêdî hêdî xete temam bikerê. Wazenê Girê Spî, Eyn Îsa, Kobanê, Cerablûs, Efrîn û Idlibî ra xetêke awan bikerê.

Rojawanî ser o gefêko pîl ê îşxalî esto. Ez venga pêro rojnameger, merdimanê demokratîkan, şorişgêran dana ke dormeyê Şorişê Rojawanî de bêrê pêser.''