Meclîsê Sûrîyeya Demokratîke (MSD) derheqê binpaykerdişê dewleta Tirkî yê adirbirnayîşî de eşkerayîyêk daye. MSD’yî pêhesna ke Enqere goreyê adirbirnayîşî tê nêgêrena.

Eşkerayîye wina ya:

“Bi tssdîqkerdişê Hêzanê Sûrîyeya Demokratîke û mabênçîye ya DYA vizêr şan pêkerdişê adirbirnayîş mabênê Hêzanê Sûrîyeya Demokratîke û dewleta Tirkî de serê dergîya dûrbîyayîşî mabênê Eyn Îsa û Serêkanîyê de ame viraştene. Hêzê Sûrîyeya Demokratîke vizêr saeta 22:00 ra nata goreyê qerarî tê gêrayî. La dewleta Tirkî û milîsê ci goreyê adirbirnayîşî tê nêgêrayê û ewro dewa Um El-Xêra ke kewena başûr û rojakewtena Serêkanîyê bombardûman kerde. Netîce de 5 şervanê QSD’yî û tayê sivîlî şehîd kewtî. Bombardûman dewam keno û resnayîşê birîndaran û xelisnayîşê sivîlan rê beno asteng.

Ma Meclîsê Sûrîyeya Demokratîke, rayaumûmîya cîhanî muxatab gênê û înan rê qetî kene ke ma bingeyê pawitişî yê cuya şarê ma ra û wedaritişê koçkerdişî ra, bingeyê yewîya erdê Sûrîye ra pêkerdişê adirbirnayîşî tesdîq kerd. La Enqere û artêşa ci bi hezaranê çeteyanê xo reyde no pêkerdiş binpay kerd û hêrişanê xo rê dewam kerd. Coka ma veng danê NY, Konseya Asayîşî ya Mîyanneteweyî û El-Camîa El-Erebîye bi taybetî DYA çunke aye mabençîye kerde ke berpirsîyarîya xo bîyarê ca û çimdaranê mîyanneteweyî seba pawitişê adirbirnayîşê demdemî bierşawê herême. Û bikê ke no adirbirnayîş daîm bibo û artêşa Tirkî ya îşxalkare peyser biance. Artêşa Tirkî ya îşxalkare û çeteyê ci herême de qirkerdişan kenê, Rêxistina Efûyî no raporanê xo de qetî kerd. Ma sipasîya pêroyê kesayetî, hêzanê cîhanî rê kene ke paştdayîşê înan dewam bibo, şer û dişmenîya Tirkîya nêrese armancê xo. Ma bale ancenê ke rayîrê qedînayîşî yê alozîya Sûrîye, mabençîtîya NY’yî reyde yê pê dîyaloganê sîyasîyan o.”