Dima ke dewleta tirke 9ê teşrîna verêna 2019î de vera Rojawanî dest pê hêrişî kerd beşêkê şarê herême koçê Reqa kerd. Îdarekarê Reqa xîret kenê ke şar vîrusê Korona ra bipawê.

Hêzanê Sûrîyeya Demokratîke (QSD) serra 2018î de Reqa DAÎŞî ra xelisnabi. Dima zî Meclîsê Sivîlî yê Reqa ame awankerdene. Meclîs xîret keno cewab bido hewcedarîyanê şarî. Şaro ke îşxalê dewleta tirke de neçare mend ke koç bikero verê xo da Reqa. Nufusê Reqa 800 hezar o û tede tewr tay 75 hezar koçberî estê.

Hemserekê Meclîsê Sivîlî yê Reqa Mihemed Nûredînî îfade kerd ke na rewşe milê Reqa de barêko giran o û ard ziwan ke rixmê zehmetîyan zî ê îmkananê xo seferber kenê ke hetkarîya koçberan bikerê. Nûredînî vat: ''Şer de Reqa zaf zerar dî. Hetê bînî ra me berê xo seba koçberan zî akerdî. Îdlîb, Serêkanîyê û Girê Sipî ra zaf koçber ameyî. Şaro ke Reqa ra koç kerdbi zî agêrîya. Ma sey Meclîsê Reqa destê ma ra çi yeno seba şarê Reqa û koçberan kenê.

Dima ke vîrusê Korona herême de vila bi Îdareyê Xoserî tay qerarî girewtî. Meclîsê Reqa zî nê qerarî ardî ca. Ma karê dezenfekte û pakî kerdî, merkezê karantîna awan kerdî. Hetê bînî ra ma xebata zanayîşdayîş zî kenê. Seba ke şar keyeyê xo ra mevejîyo ma tedbîrî girewtî. Îdareyê Xoserî zî paştî da keyeyanê hewcedaran. Ma înan rê sipas kenê. Xebatkarê weşîye, doktorî bêpere xizmet danê. Ma înan rê zî sipas kenê.

Ma komîteyêka krîzî zî awan kerde. Dekewtiş û vejîyayîşê herême zî yenê kontrolkerdene.  Tîmê şaredarîya Reqa tim xebitîyenê. Firinê ma xebitîyenê. Beşêkê nêweşxaneyê Watanî seba karantîna û weşkerişî amade yo. KPC zî înternet de perwerdeyê domanan keno. Şarê Reqa nê prosesî de zaf hetkarîya ma kerde.''