Seke 1'ê Teşrîna Peyêna 2014 de seba Kobanê asta mîyanneteweyî de paştdayîş ame kerdene, do emser zî 2'ê Teşrîna Peyêne de zî çalakîyî bi heman hewayî bêrê kerdene. Bi nê armancî çalakî û nawnayîşî do bêrê viraştene.
World Resistance Day for Rojava (Seba Rojawanî roja xoverdayîşê dinya) veng da her kes ke tewrê çalakîyanê bêîteatan ê sivîlan bibê û viraştoxê 2'ê Teşrîna Peyêne bibê.
Eşkerayîye wina ya:
"Komelanê Vakur û Rojakewtena Sûrîye îdareyê xo saz kerd, cayêkê haştîye saz kerd ke komanê herême bi hewayêkê haştîyane, pîya ciwîyayêne. Federasyono Demokratîk ê Vakur û Rojakewtena Sûrîye despotîzmî ra û îdarekaranê teberî ra zêder Rojakewtena Mîyanêne vurnaye. QSD'yî tewr peyêne DAÎŞ'o ke hemkarê Tirkîya yo, çin kerd.
Çeteyê DAÎŞ'î û El Qaîdeyî bi hêrişê îşxalkarîye ya Tirkî reyde şinê, ters û teror vila kenê. Dima ke yewîyanê DYA û Koalîsyona Mîyanneteweyî herême ra xo tepîya ant, no bîyo sebebê hêrişanê Tirkîya. Artêşa Tirkî û cîhadîstan pê çekanê NATO qirkerdiş kenê û dewletanê dinya zî qerar girewt ke naye nêvînê.
Verba nê qirkerdişanê ke verê çimanê dinya de yenê kerdene, ma do bêveng nêmanê û têna seyr mekê. Têna têgêrayîşêkê verba şerî eşkeno nê şerî asteng bike. 1'ê Teşrîna Peyêna 2014 de bi mîlyonan merdiman paştdayîşê xo yê seba Kobanê mojna û weriştî payan ser. Ma veng danê ke 2'ê Teşrîna Peyêne ya emserî bikê roja xoverdayîşê mîyanneteweyî yê verba hêrişanê îşxakaran ê Tirkî, her kes tewrê nawnayîşan, çalakîyanê sivîlan û bêîteatan û çalakîyanê viraştoxan bibê. Heta ke no qirkerdiş dewam bike ganî xoverdayîşê ma zî nêvindero. Şorişê Rojawanî do ser bikewe, faşîzm do çin bibe."
