Şarê Rojawanî seba ke cenazayanê ke dafika PDKyî de şehîd bibî bigêrê 5ê teşrîna verêne ra nata çalakîyanê xo rê dewam keno.

HPGyî 3ê teşrîna verêne ya 2021î de eşkerayîya xo de pare kerdbi ke şewa 29ê tebaxa saete 02.30 de komêka 7 gerîlayan wexto ke Qendîlî ra derbazê Behdînanî bîyêne PDKyî vera înan dafike ronaya. HPGyî vatbi: ''Eşkera bi ke netîceya nê hêrişî de 5 embazê ma şehîd bîyê, embazêkê ma beno ke birîndar bîyo. Embazê ma Hakîyî raşta raşte serebût dîyo û wextêkî ra dima weş û war cayê serebûtî ra agêrayo. Embaz Hakîyî xo resnayo hêzanê ma û hêriş zaf hetan ra zelal kerdo.''

Îdarekaranê Meclîsê Keyeyanê Şehîdan ê Herêmanê Cizîre û Efrînî ANFyî rê çalakîyê înan ercnayî.

Hemserekê Meclîsê Keyeyanê Şehîdan ê Herêma Cizîre Hasan Ibêdî da zanayene ke hêrişê Xelîfanî ra dima înan dî ke PDK yewîya kurdan ra dûrî yo û hemkarê dewleta tirke yo. Ibêdî vat: ''Gerîlayî seba azadîya welatê xo têkoşîn kenê. Hêrişê vera gerîlayan yeno manaya dişmenîya vera kurdayetîye. Seba ke ma cenazayanê xo bigêrê 111 rojî verê Berê Sînorî yê Sêmalka de çalakîya xeyme kerde û venga PDKyî da. Nika her cayê Rojawanî de çalakîyê ma bi hawayêkê cîya-cîyayî dewam kenê. Ma qerardar ê ke heta ke cenazayanê xo bigêrê çalakîyanê xo rê dewam bikerê. Ma venga keyeyanê şehîdan ê Başûrî û pêro şarê kurdî danê ke dormeyê HPGyî de bêrê yewca.

Nêçirvan, Mesrûr û Mesûd Barzanîyî verê xo dayo dewleta tirke. Hînî her kes zaneno ke kam xo ver dano, kam xeta xîyanetî ser de yo.  Ma ganî dest bidê destî û wayîrê erdê xo û şehîdanê xo vejîyê. Wext wextê xoverdayîş û azadîye yo.''

Hemserekê Meclîsê Keyeyanê Şehîdan ê Efrînî Fewzî Mistefayî bale ante hemkarîya PDK û dewleta tirke ser û vat: ''PDK sey dewleta tirke vano ke Başûr de estbîyayîşê gerîlayan înan rê gef o. Xelîfan de PDKyî 6 gerîlayî şehîd kerdî. PDK seba ke nê qirkerdişî binimno cenazayan nêdano. Ma do nê kerdişanê keyeyê Barzanîyan xo vîr a mekerê û heta ke cenazayanê xo bigêrê mevinderê.  Barzanîyî îdîa kenê ke ê way û birayê ma yê. Teda û zorbazîya dişmenî bes nêbî ê PDK zî tedaya kurdan keno.

Wext wextê yewîye û azadîye yo. Şarê ma yê Kurdîstanî û teberê welatî ganî wurzo payan ser û dişmenî hol bişinasnê. Ganî ma hol bizanê ke kamî Kurdîstan de hesabê dişmenî rê xebitîyenê.''