Hemserekê Heyetê Têkilîyanê Teberî yê Îdareyê Xoserî yê Rojawanî Abdulkerîm Omerî derheqê hêrişê DAÎŞî yê vera Zîndanê Sinaa de ANFyî rê qisey kerd.

Omerî da zanayene ke hêrişê vera Hesekê planêko hîra bi û dewleta tirke bi hawayêkê aktîfî mîyanê nê planî de ca girewto. Omerî vat: ''Armancê nê hêrişî ganîkerdişê DAÎŞî û çinkerdişê Îdareyê Xoserî bi. Verê nê planî ame girewtene. Ma erdî ra DAÎŞ qedînabi la ferasetê DAÎŞî dewam keno. Hema zî Kampa Holî de bi hezaran cergê DAÎŞî û keyeyê înan estê. Hêzê mîyanneteweyîyî vera DAÎŞî mesuldarîyanê xo nêanê ca. Berê Sînorî yê Til Koçerî girewte yo, ambargo esto. No zî keno ke DAÎŞ xo bîyaro pêser. Hêriş û gefê dewleta tirke zî zemîn danê DAÎŞî.

Ma prosesê Baxozî ra dima venga hêzanê mîyanneteweyîyan da ke wa cergê DAÎŞî bêrê muhakemekerdene. La cewab nêdîya nê vengdayîşî. Zîndanê Sinaa de bi hezaran cergê DAÎŞî estê, Kampa Holî zî wina ya. Nê cayî vurîyayî merkezê newe ra ganîbîyayîşê DAÎŞî. Nê cayan de domanî zî estê ke beno ke ê zî ameyox de bibê milîtananê DAÎŞî. Seba ke hêzê mîyanneteweyî erkanê xo nêkenê nê meseleyî qewimîyenê.''

Abdulkerîm Omerî ard ziwan ke ganî paştdayîşê Tirkîya yê bi DAÎŞî û gef û hêrişê înan bêrê qedînayene. Omerî vat: ''Ganî hetê sîyasî ra paştî bêra dayene herême, berê sînorî bêrê akerdene. Heta ke Sûrîye de çareserîyêka demokratîke, aramîyêka pêroyîye nêra caardene DAÎŞ nêqedîyeno. Eke Sûrîye mîyanê xo de sîstemêkê demokratîkî yê nemerkezî bi rêxistin bikerê. Çareserîye wina mumkîn bena.''