Rojawan de mabênê PYD û ENKSî de pêvînayîşê seba yewîye dewam kenê. Vizêr şan Rojawan de 25 partî û dezgehan pê deklerasyonêkê hemparî pare kerd ke ê binê sîwana Partîyanê Yewîya Neteweyî ya Kurdan (PYNK) de ameyî têhet.

Vervatoxa PYDyî Sema Begdaş ajansê ma rê qala armancê awankerdişê PYNKyî kerde. Begdaşe vat: ''PYNK do  pêro pevînayîşanê neteweyî û mîyanneteweyîyan de venga temsîlkaran bikero û pê tewirêkê hemparî yê neteweyî do tewrê nê pêvînayîşan bibo. Temsîlkarî zî do bêrê eşkera kerdene beno ke 5-7 kesî bibê. Yewîya neteweyîye waştişê şarî yo û ganî bêra caardene. Sey PYDyî nêzdîbîyayîşê ma wina yo. Ma nê esasî ser o ENKSî reyde zî pêvînayîş kerd. Ganî na hemkarîye bêra zêdînayene.

Ma bingeyê yewîya neteweyîye ser o derheqê yewîya neteweyîye de tay projeyî amade kerdî.  Seba yewîya neteweyîye ma amade yê. Ma do pê pêro hêzê xo bixebitê. Seba ke kurdî parçe nêbê bêrê ma pîya yewîya neteweyîye têkoşîn bikerê û destkewteyanê şarê xo bipawê.''