Verê Berê Sînorî yê Sêmalka  yê Rojawan-Başûrê Kurdîstanî de çalakîya nobete roja 62. de dewam kena. Çalakîye de cenazayê gerîlayanê ke Xelîfan de hetê hêzanê PDKyî ra ameybî şehîdkerdene yenê waştene. Çalakîye ewro hetê endamanê Meclîsê qeza Çilaxa ra ameye dewrgirewtene.

Çalakwanê Çilaxa hetê çalakwananê Tirbesipîye ra bi sloganan ameyî verwazîkerdene. Badê rayraşîyayîşî çalakwanî Fişxabûr de ameyî têhet. Badê rêzgirewtişê semedê şehîdanê têgêrayîşê azadîye bi nameyê grûba newîye Selam Ramoyî qisey kerd. Ramoyî vist vîrî ke çalakîye di mengî xo dima verdayî û vat: ''Ma cenazayanê şehîdanê xo wazenê.Ganî heme şarî wayîrê şehîdanê ke ganê xo ma rê kerd feda, vejîyê. Wa şarê Başûrê Kurdîstanî zî berpirsîyarîya xo bîyaro ca paştî bido ma. Waştişê ma pêrune oyo ke wa mabênê kurdan de xayînîye çînê bo.''