Hevrîne Xelef 12 teşrîna verêne ya 2019î de hêrişê îşxalî yê dewleta tirke yê vera herêmanê  Serêkanîyê û Gir Sipî de hetê çeteyanê Ehrar El Scharqiye yê ke dewleta tirke paştî dana ci, Girê Sipî de bi îşkenceyî ameye qetilkerdene. Ma Hemkara Hemserekanê Partîya Ameyoxê Sûrîye Semîra El Eziz reyde serrgêra şehadetê ci de derheqê hemraya ci Hevrîne Xelef de qisey kerd.

Sûrîye Semîra El Eziz nê vatî: ''Mi 2011 gama ke vengê gamanê şorişî ameyêne Hevrîne sarisna. Hevrîne  Heyetê Enerjî de bî ez Heyetê Perwerdeyî de bîya. Heta 2018 ma xeylêk mekananê hemparan de ameyî têhet. Aye tim bi fîkîr û vernîyazanê xo ver akerdêne. Hevrîne xebatanê xo de bi serkewtişî game girdî eştî. 2015 de bîye Hemsereka Komîteya Ekonomî ya Cizîre. 27ê adara 2018 de  Reqa de Partîya Ameyoxê Sûrîye na ro. Bi ronayîşê na partî têna awenkerdişo sîyasî pênêard, eynî wextî de komayê etnîkî yê cîyayî ardî têhet û bîye serkêşa ameyoxê neweyî. Sey Sekretera Pêroyî bîye vengê edalet û seyyewbînîye. Hevrîne bebeta îdarekerdişî de profesyonel û cinîyêka serkêşe bî. Heqê dîplomasî û sîyasîyî ra ameyêne. Hevrîne ronayoxanê Partîya Ameyoxê Sûrîye ra yew bî. Eslê xo de na partî bi kede  û cehdkerdişê Hevrîne ameye ronayene.

Hevrîne Xelef sey sîyasetmedara cinî ya kurde vera tarîtîya DAÎŞî vindertêne û wayîrê Şorişê Rojawanî vejîyayêne. Aye bi xo xeylêk cinîyî kerdî mîyanê falîyetanê sîyasîyan. Tekîlîya Hevrîne bi rîsipîyanê eşîranê ereban bibî. Serkêşîya dîyaloganê bi şaran kerdêne. Reyna cinîyan û ciwanan reyde zî tekîlîya ci xurt bî. Hevrîn têkoşîno hempar ê şarî sey adresê çareserî hesibnayêne û xebatê xo wina rayraberdene. Vera tarîtîya DAÎŞî serberz vindetêne û sey meşaleyî beriqyayêne û ameyox kerdêne roşn. Ehrar El Şergiye Hevrîne Xelef û xeylêk sîvîlî qetil kerdî. Neteweyê Yewbîyayeyan Ehrar el Şergiye sey sûcdarê şerî sûcdar keno la çeteyê rayberî yê Ehrar El Şergiye Tirkîya de ciwîyenê û rey şuxilnenê. Wezîfeyê ma yo ke am têkoşînê hemparî yê şaran xurt bikerê xeyalanê Hevrîne bîyarê ca.''