12ê adara 2004î de maçê futbolî yê mabênê taximanê Fetva û Cîhadî ra dima şarê Qamişloyî vera hukmatê Şamî werişt payan ser. Nê serewedaritişî 18 serrî xo pey de verdayî. Dejê şarê Qamişloyî zî hema teze yo.

Maçê Fetva û Cîhadî de tay provakatoranê rejîmê Şamî seba dîktator Saddam Huseynî û vera kurdan sloganî vatî. Roniştoxanê Qamişloyî zî vera ney nêrazîbîyayîşê xo mojna. Naye ser o komanê çekdaranê ke xo amade kerdbi hêrişê şarî kerd. Polîs û leşkeranê rejîmê Baasî 2ê ci domanî 9 sivîlî qetil kerdî.

Dima ke serebût ame eşnawitene roniştoxê Qamişloyî ver bi stadî şîyî. Labelê narey bi fermanê mesuldarê wîlayetê Hesekê Selîm Kabûlî polîsan guleyî eştî girseyî ser. Naye ser o şaristananê Rojawanê Kurdîstanî, kurdanê Şamî û kurdanê şaristananê bînan ê Sûrîye sere wedarit. Serewedaritiş de 36ê ci kurdî 50 kesî kişîyayî, bi seyan kesî birîndar bîyî û tepişîyayî.

Serewedaritişo pîl

13ê adare de Qamişlo de serewedaritişêko pîl qewimîyan. Bi hezaran merdimî verê Camîyê Qamişloyî de ameyî yewca û seba definkerdişê şehîdan înan dest pê rayraşîyayîşî kerd. Şarê Amûdê û Tirbespîyê zî tewrê rayraşîyayîşî bi. Rejîmê Baasî tersê hêrsê şarî ra dezgehê xo veng kerdî û rema. 

Wexto ke girse şîyêne Baasî hêrişê înan kerd. La rixmê hêrişî zî girseyê bi 600 hezar kesan cenazayî berdî û defin kerdî.

Şarê kurdî sere de Qamişlo, Dêrik, Amûdê, Hesekê, Kobanê, Efrînê, taxanê kurdanê Reqa û Helebî de werişt we. Serewedaritişê kurdan 13ê adare de paytextê Şamî de zî vila bi.

Hêzanê çekdaran ê Baasî pê qirkerdişî cewab da kurdan. Kurdan zî Dirbêsiyê û Amûdê de peykerê Hafiz Esadî rijnayî û awanîyê hukmatî Kobanê de girewtî binê ablûqa. 

Şahîdanê qirkerdişî ra Hemdîn Nebîyî wina qala ê rojan kerde:

''Terefgîrê taxima Fetva seba ke hêrişê ma bikerê Dêra Zorê ra ameybî. Înan heqaretê sîyasetmedaranê kurdan kerd. Wezîfedaranê hukmatî mudaxeleyê înan nêkerdêne la dima bi guleyan hêrişê ma kerd. Ma mîyanê terefgîranê Fetva de mendbî. Mesuldarê Wîlayetê Hesekê Selîm Kabûlî ferman da ke leşkerî guleyan bierzê ma. Dezgehanê medyaya rejîmî vatêne 3 domanî uca de binê lingan de eciqîyayî la a raşte 6 kesî uca de şehîd bîyî. Ma şehîdê xo verî berdî Camîyê Qamişloyî dima zî waşt ke înan defin bikerê. Her ca de leşkerê Esadî ca bibî. 

Qirkerdişî ma zaf dejnabî la yewbîyayîşê kurdan ra kêfê ma amebi. Şarê kurdî o çax bi yewîye û paştdayîşî têgêra. Serebût Qamişlo de qewimîya la vengê ci Efrîn de vejîya.

13ê adare de rejîmî dest pê tepiştişî kerd û çend rojan de bi desan merdimî tepiştî. Ez û birayê mi mengêke û 17 rojan, birayê min ê bînî zî 9 mengan zîndanan de mendî. Ma zîndanan de heqaret, îşkence û kerdişê cîya-cîyayî dîyî. Serewedaritişê ma mengêke û nême dewam kerd.''

Nika Rojawan de projeyê wayûbiratîye esto. Her serre 12ê adare de maçê taximanê Dêra Zorê û Qamişloyî esto. Îdareyê Xoserî cara nameyê ê stadî kerd 'Stadê Şehîdanê 12ê Adare.' 

Serewedaritişê Qamişloyî zî bin bingeyê Şorişê Rojawanî yê 19ê Temmuze.

Seba vîrameyîşê şehîdanê Qamişloyî her serre 11ê adare de şan findî yenê tavistene. 12ê adare de saete 11.00 de şar deqayêkî rêz gêno.

Siba: Serewedatişê 12ê Adare ra ver bi Newroze