Ewro Şehba de 14 hezarî wendekarî dibistana verêne, mîyanên û lîse de wanenê. 777’ê ci cinîyî 991 mamostayî bi fedakarîye xebetînê. Efrîn de serra 2011’î ra dima, bi prosesê destpêkerdişê şoreşî, perwerdeyo bi Kurdî amebi destpêkerdene. Verî hetê çend ciwanan ra keye de ame dayene û mabênê 7 serran de sîstem amebi awankerdene: dibistana verêne ra heta awankerdişê unîversîteya Rojawanî ya verêne aver şî. Îşxalî ra ver Efrîn de 50 hezar wendekarî bîyî.  16’ê Adare 2018’î de qerarê vengkerdişê Efrînî ame girewtêne. Şarê Efrînî bî koçber û şî Şehba û Şêrawa. Nê cayan de zî wextêkê kilmî de dest kerd bi rêxistinbîyayîşî û komîn, meclîs û sîstemê perwerdeyî newe ra awan kerdî.

Endama Komîteya Perwerdeyî ya Demokratîke mamosta Gulîstane, derheqê prosesê Efrîn ra ameyena Şehba û ronayîşê sîstemê perwerdeyî de malumatî dayî ANF’yî. Gulîstane wina va: ”Ma 16’ê Adare de kewtî rayîr. Seba ma rojêka zaf bijane bîye. Şewa Newroze de mamosta û wendekarê ma restî Şehba. Moralê ma zaf xirab bi, ma vatêne qey her çî qedîyayo. Roja Newroze şehîdê ma ardî qezaya Ehrezî. Ma zî şîyî merasim. Ma dî ke tîya de zî êdî şehîdê ma estê.

MA BI SAYA WENDEKARAN AMEYÎ PÊSER

Merasim de wendekarê ma ameyî ma het û va dibistanê ma kotî yê. Na perse ra dima ma fehm kerd ke ganî ma bêrê pêser û xo bidê arê. Ma giran giran mamostayî û wendekarî ardî pêser. Ma pîya dewe bi dewe, keye bi keye gêrayî. Ma pêro wendekarê xo zîyaret kerdî. Ma dî ke wendekarê ma sîstemê perwerdeyî yê Efrînî wazenê. Bi nê qeydeyî moralê ma ame bi ca û ma dest bi xebate kerd.

MA PEYSER GAME NÊEŞTE

Efrîn de wextê termînê verênî de hêrîşan destpêkerdbi, naye ra zî ma dest bi termînê diyînî nêkerdbi. Ma dest bi termînê diyînî kerd. Reyna xeylî wendekaranê ma lîse qedênaybî û ganî derbazê unîversîte bibîyêne. Seba ke ma înan bierşawê Unîversîteya Rojawanî ya ke Cizîre de bîye, dest bi xebatan kerd. Bi nê xebatan moralê ma û ê şarê ma ame bi ca. Xora dişmenî waştêne ke moralê şarî bişikîyo û peyser game bierzo. La ser nêkewt. Ma komîn û keyeyî zîyaret kerdî û wendekarî ardî pêser. Rojanê verî de, seba ke awanîyî çin bî, ma çadiran de perwerde da. Na rewşe di mengî wina dewam kerd.

DERSE RA VER PAŞTDARÎYA MANEWÎYE

Xora no proses de wendekarî ancax ameyî pêser û motîve bîyî. Çunke her keyeyê Efrînijan de yew-di kesî yan bîbî şehîd, yan zî bîbî birîndar û na rewşe psîkolojîyê domanan kerdbi xirab. Verê çimanê tayê wendekaranê ma de yan pî, yan bira, yan zî maya ci ameybî kiştene. Xeylî wendekaran de psîkolojîyê ‘her çîyê ma qedîyayo, perwerde çi hewce keno’ vejîyabi meydan. Ma o wext fehm kerd ke perwerde çiqas muhîm o. Çunke psîkolojîyê nê domanan ancax bi perwerde beno rast. Ma xo mabên de qisey kerd û qerar da ci ke, dersan ra zîyaderî îhtîyacîya wendekaran bi moral û motîvasyonî esta û ma zî wina kerd. Nê prosesî de ma Heyva Sor a Kurdî ra zî paştdarîye girewte.

DIBISTANANÊ BÊBER Û BÊPENCEREYAN DE

Di mengan ra pey tatîlî dest pêkerd. Ma Komîteya Perwerdeyî ya Demokratîke, xebatê xo domnayî. Ma şîyî zîyaretê keyeyan û şarê xo reyde qerar da ci ke ma do bi sîstemê perwerdeyî yê Efrînî dewam bikerê. Wendekarê ma yê ke lîse ra bîyê mezun, ma erşawitî Herêma Cizîre. Nê wendekaran ra tayê ci şîyî Akademîya Mezopotamya û tayê ci zî şîyî Unîversîteya Rojawanî. Ma 78 wendekarî erşawitî.

Dibistanî ke newe ra abîyî, ma fehm kerd ke çadiran de perwerde zehmet o. Ma awanîyê ke estê, newe ra tamîr kerdî û xo rê kerdî dibistanî.

NIKA 14 HEZAR WENDEKARÎ ESTÊ

Di menganê verênan de 4 hezar wendekarê ma bîyî, la ewro 14 hezar wendekarê ma estê. Sîstemê perwerdeyî yê ma sîstemo ke Efrîn de ameybî awankerdene yo. Reyna her kes bi ziwanê xo perwerde vîneno. Erebî bi Erebkî, Kurdî bî Kurdkî. Mufredat goreyê sîstemê neteweyî yê demokratîkî ame amadekerdene. Her çiqas ke îmkanî zor bidê ma zî, ma bi îrade û cehdkerdişî kenê ke sîstemê perwerdeyî hîna pêt bikê. Sey nimûne, banan dilop kerdêne û wendekaran destê xo kaxizanê xo ser kerdêne sîper û wina nuştêne. Reyna xeylî sinifan de ber û pencereyî çinbî û ma bi batenîyeyan girewtî. Seba ke sinifî tarî bîyî, wendekaran çilayî fîstêne ta û wina wendêne.

MA DO QETÎYA VÎNDÎ NÊKERÊ

Ez na saete ra dima eşkena wina vaja: ma do qetîya vîndî nêkerê. Şarê ma her zor û zehmetî ver alternatîfanê xo virazeno. Nêverdano ke astengî û zorî ê bişiknê. Şarê ma her tim aver game erzeno. Nika 991 mamostayê ma estê û nînan ra 777’ê ci cinî yê.

MA RÊXISTINBÎYAYE YÊ Û MA DO PEYSER AGÊRÊ

Ma bi paştdarîya Sazîya Keyeyanê Şehîdan, Şaredarîye û Heyva Sor a Kurdî, pereyî arê dayî: çente, qelem û defterî herînayî. Moral û motîvasyonê wendekaran bi na kampanya hîna bî baş. Tatîl de mamostayî zî seba ke hafızaya xo bikerê newe û kêmasîyanê xo çareser bikerê kewtî perwerde.

Ma şarê Efrînî şarêko rêxistinbîyaye yê û ma do peyser agêrê Efrîn.