Taburê Şehîdan Nûbar Ozanyan o ke serrgêra 104. ya Qirkerdişê Armenîyan de Sûrîye de awan bi destkewteyanê hêzê pawitişî û Şorişê Rojawanî ra yew o. Fermandaranê taburî ra Nûbar Melkonyanî derheqê tabur û plananê ameyoxî de ANFyî reyde qisey kerd.

Melkonyanî vat: ''Şorişê Rojawanî têna şorişê cinîyan û ê kurdan nê, şorişê pêro bindestan ê nê erdî yo. Ereb, sûryan, asûr û armenîyan zî şoriş de ca girewt. Rolê nê şorişî hîşyarbîyayîşê armenîyan de pîl o. Armenîtîya ke Tirkîya de sey qijkek yena hesibnayene Rojawan de bîye wayîra rûmetî û îradeyî. Armenîtîye newe ra bîya wayîra nasnameyêkî. Şorişgêrê armenîyî zî Şorişê Rajawanî de şehîd bîyî. Înan ra yew zî Nûbar Ozanyan o. Embaz Nûbar rayberîya hemleyan kerde, vera cergan şer kerd, armenîyî perwerde kerdî. Armenîyê ke ameyêne Rojawan asîmîle bibî. Ê wexto ke ameyî tîya dî ke înan ra ber zî armenîyî estê û wayîrê hêzî yê. No seba înan bi hêz û qerardarîye. Embazan nê erdî de xo aver berd. Taburê ma hem hetê leşkerî ra xo perwerde kerd hem zî cepheyê Serêkanîyê û Til Temirî de ca girewt. Hema zî seba pawitişê erdê azadî cephe de yo.

Tabûr de perwerdeyê leşkerî reyde perwerdeyê tarîxê qirkerdişî, kultur û ziwanî zî estê. Mabênê kurdan û armenîyan de gamêka seba dostîyei wayûbiratî ameye eştene. Xelisîyayîş û azadîya ma pîya yê. No ca zî îsbatê na raştî yo.  Ma wazenê no dewam bikero û bibo pîlêr.

Ma wazenê taburê xo bikerê tugayêko pîl. Zaf kesî estê ke wazenê şaristananê Sûrîye, Lubnan, Armenîstan, Kurdîstan û Ewropa ra tewrê ma bibê. Potansîyelêko pîl esto. Hetê bînî ra armenîyî xîret kenê ke pê meclîsêk xo birexistin bikerê. Seba nê karan xîretê ma dewam kenê.''