Şorişê Rojawanî ke serkeşîya cinîyan de ame kerdene cuya xeylêk cinîyan ê şaranê cîya cîyayan bedilna. Cinîyê  ke warê komelkî, sîyasî û leşkerî de têkoşîn kenê ameyoxê xo înşa kenê.

Têkoşêranê azadîye ra yewe zî Hebûna Ereba ke tewrê sefanê YPJyî bîyî. Erebe bi têkoşînê xo cinîyan rê bena hevî.

Erebe ard ziwan ke  bi destpêkerdişê krîzê Sûrîye, Humus û dormeyê ci de şer bi xorî coka înan bar kerd şîyî Reqa û nê vatî: ''Ma nêzanayêne ke Reqa paytextê çeteyanê DAÎŞî yo. Ma nêzanayene DAÎŞ çîyo. DAÎŞ bizor waşt ke ma qanûnanê înan bîyarê ca. Qanûno verên zî yerima sîyaye bî. Mekteb de têna dersê dînî estbî no zî goreyê îslamî nê goreyê fîkrê çeteyan bi. Eleqeya înan û îslamî çînêbî. Mi bi çimanê xo zaf rey dî ke çeteyî şarî rê senî îşkence kenê. Înan ra çîyêk esto ke çirey vîrê mi ra nêşino. Verê kênaya ci de babî kişt.''

Ereba ke çeteyêkî dir ameye zewijnayene derheqê o prosesî de nê vatî: ''Ez çeteyêkî dir ameya zewijnayene, ê tim mi rê zext û şîdet kerdene û destur nêdayene ez vejî teber. Eke çeteyêk yew cinî vîno û biwazo bizewîjîyo, rizaya cinî û keyeyê ci muhîm nîya. Cinî mecbur ey dir zewijîyena û bena aîde ey. Eke çete bimiro cinî mecbur çeteyêkê bînî dir zewijyayêne. Cuya ma pê zext û îşkenceyî ravêrtene.''

Erebe sebebê tewrbîyayîşê YPJyî zî wina eşkera kerde: ''Nizdê serrêke verê cu ez tewrê YPJyî bîya. Dima mi fehm kerd ke ez cinîya û hêzê mi zaf o. Mi îqtîdarê camêrdî nas kerd û xo fehm kerd. Verê azadkerdişê Reqa ez di serrî çeteyanê DAÎŞî reyde ciwîyaya. O wext dinya ra hayîya mi çinêbî. Mi nêzanayêne ke azadîya cinîyan çîya. Seba ke kurd, ereb û suryanîyanî YPJ de pîya şer kenê ez zî tewrê ci bîya. Hetê bînî ra camêrdo ke mi kerd koleya xo, mi waştêne ez ramojnê ci ke ez eşkena azad biciwîye.Mi warê şerî de dî ke mabênê cinî û camêdî de ferq çîn o. Humus de ez nêeşkayêne vera dişmenî çeke bigerî û şer bikerî la tîya ez eşkena semedê azadîya xo şer bikerî û seba ke ez raşta zî wazenê vera dişmenî şer bikerî ez tewrê YJPyî bîya. Seba ke mi verî şer nêkerd mi zaf dej ant. Nika wazena ke şer bikerî û destkewteyanê xo bipawî. Ganî heme cinîyî vera koletîye, semedê azadîya xo têkoşîn bîkerê.''

Erebe ard ziwan ke yew lajê aye zî esto û vat: ''Babîyê ci çete bo zî ez nêeşkenê ê caverd. O leteyêkê bedenê min o. Ez do lajê xo goreyê têkoşînê ma perwerde bikerî û bu kulturê ma pîl bikerî.''