Rayberê Şarê Kurdî Abdullah Ocalan mabênê serranê 1979-1999î de Sûrîye de mend. Şarê herême vanê ke ê prosesî de bingeyê Şorişê Rojawanî ronîya û Têgêrayîşê Azadîye Şorişê Rojawanî reyde dinya rê vila bi.

Lajê Fatma Hesen El Casim azadkerdişê Şedadî de û mêrdeyê ci zî Til Berak de şehîd bîyî. Fatmaya ke Şam de manena, dima ke Qamişlo de ca bîye eşnawena ke Têgêrayîşê Apogîran şarî paweno. Fatma û mêrdeyê ci binê tesîrê têgêrayîşî de manenê û şehadetê mêrdeyê xo ra dima Fatma tewra karanê PYDyî bena.

Fatma vat: ''Mîyanê PYDyî de ez hîna zaf projeyê Neteweya Demokratîke û wayûbiratîya şaran ra bawer bîya. Ma felsefeya Rayber Apoyî ra zaf çîyan musaya. Rayber Apoyî kerd ke ma îradeyê xo sey cinîyan bivisnê destî. Dima ke sey cinîya erebe mi fikrê Rayber Apoyî şinasnayî mi fam kerd ke azadîye çita ya. Nika ma mîyanê sîstemê hemserekîye de yê. Cinîyî pêro waran de aktîf ê. No zî xêrê Rayber Apoyî ra bi.''

Yakup Davuto ke sûryanî yo, Şorişê Rojawanî reyde Têgêrayîşê Azadîye şinasnayo. Di lajê Yakupî 2017 de Reqa de şehîd bîyî. Yakupî vat: ''Şehadetê lajê mi Gabîyî ra dima ez tewra karanê Meclîsê Xerbî bîya. Şorişî reyde ma kurdan de hîna zixmî têkilîye naye ro. Eke Şorişî ra nêbîyayêne nika şarê Sûrîye çin bîyayêne. Şorişî reyde mabênê şaranê kurd, ereb û sûryanîyan de cîyatîyî wedarîyayî. No şoriş şorişê sûryanîyan o zî.''

Kadrîye Abdulkadîra kurde 1985 de Têgêrayîşê Azadîye şinasnayo.Kadrîye kitabanê Ocalanî reyde o hîna zaf fam kerd. Kadrîye vat: ''PKK partîyêka demokratîk û merdimîye ya. PKK pêro neteweyan verar keno. Wextê Şorişê Rojawanî de 2011 de mi Şehîd Levent û Serhed şinasnayî. Lajê mi zaf tesîrê înan de mend. Dima ke ê şehîd bîyî lajê mi tewrê têgêrayîşî bi.''

Areve Kasabiana ke armenî ya, îfade kerd ke Têgêrayîşê Azadîye û Şorişê Rojawanî reyde înan manaya azadîye fam kerda û vat: ''Her kesî fam kerd ke pawitişê şarî senî beno. Wexto ke Rayber Apo Sûrîye de bi, ma pêro karê xo nimitkî ra kerdêne. Tedaya rejîmî zaf bîye. Şorişê Rojawanî no ters çin kerd, şorişî hêz da merdiman. Şarê armenîyan xo sey parçeyê şorişî vîneno û felsefeya Rayber Apoyî xo rê esas gêno.''