Pêvînayîşê seba yewîya neteweyîye mabênê Partîyanê Yewîya Neteweyîye ya Kurdan ê Rojawanî (PYNK) û ENKSî de destpêkê na serre ra nata dewam kenê. Heyetêkê ENKSî hewteyê vîyarteyî de reyna Anqara de selahîyetdaranê tirkan reyde ronişt û na babete zî bîye sebebê qesawetî. Hemserekê Meclîsê Rayberdişî yê TEV-DEMî Xerîb Hisoyî  pêvînayîşê PYNK û ENKSî ANFyî rê ercnayî.

Hemserekê Meclîsê Rayberdişî yê TEV-DEMî Xerîb Hisoyî ard ziwan ke rayaumûmîya kurdan paştî dana nê pêvînayîşan.  Hisoyî da zanayene ke ge ge pêvînayîşî vindenê û sebebê naye zî pêvînayîşê bi welatanê xerîban o. Hisoyî bale ante pêvînayîşê ENKSî yê bi dewleta tirke ser û vat: ''ENKS pêvînayîşê Anqara ra dima eşkerayîyan dano, fotografan gêno. Têna ma nê komel zî ney ra ecîz o. Kurdî dewleta tirke sey dişmen vînenê. Coka şarê ma pê têgêrayîşê ENKSî qayîl nîyo. Beşêko pîl ê komelî zî pê ENKSî bawer nîyo.Rolê înan îşxalê Serêkanîyê, Girê Sipî, Efrîn de esto coka. Her pêvînayîşê ma ra dima ENKS şino Anqara. Nê pêro mesele yê.''

Hisoyî perwerdeyê bi kurdkî, sîstemê hemserekîye û Îdareyê Xoserî rê nêzdîbîyayîşê ENKSî ercna û vat: ''Dewleta tirke dişmena kurdkî,demokrasî û azadîya cinîyan a. ENKSî waştişê înan pêvînayîşan de sey şertan vetî werte. Pêvînayîşanê yewîya neteweyîye ra dima pêvînayîşê mabênê Îdareyê Xoserî û rejîmê Şamî vindertî. Çunke ENKS dewleta tirke ferz keno. Tewirê ENKSî her hetan ra bi sebebê sistîye. Ma qayîl ê way û birayanê xo yê ENKSî rê vajê ke êyê esasî pêvînayîşê Qamişloyî yê. Îradeyê ma kurdan û şaranê herême Qamişlo de temsîl beno. Cayê çareserîye Qamişlo yo. Anqara, Îstanbul yan zî Dîlok nîyo. Heta key ENKS do dewleta tirke bivîno? Ma dewleta tirke ra heta nika yew fayde nêdî.Ma pê hêvîdar ê ke ê do zî hînî naye bivînê û tesdîq bikerê ke çareserîye Qamişlo yo.''

Xerîn Hîsoyî peynîya roportajî de wina qisey kerd: ''Terefgîrê ENKSîyê ke Rojawan de manenê û terefgîrê ENKSîyê ke sey Tirkîya welatanê bînan de sîyaset kenê sey ci nêfikirîyenê. Terefgîrê ENKSî yê Tirkîya dest nanê îradeyê ê bînan ser zî û menfaatanê dewleta tirke pawenê. Ê tîya naye hol zanenê û şaşîyan hol analîz kenê. Labelê ENKSê Rojawanî zî seba ke destê ci ra çîyêk nêno bêveng maneno.''