Têgêrayîşê Komelê Demokratîkî (TEV-DEM) vera sûcanê dewleta tirke ya îşxalkere û çeteyanê ci yê Efrînî eşkerayîyêke daye û bale ante mesuldarîya hêzan ê mîyanneteweyîyan ser.

Eşkerayîye wina ya:

''Binpaykerdişê dewleta tirke û cerganê ci Efrîn de roje bi roje zêdîyenê. Îşxalê tirkan û cerganê înan pê rayîrê rijnayîş û kenayîşê cayan ê tarîxîyan, rijnayîşê goran û akerdişê goranê şehîdan sîyasetê vurnayîşê demografî û sûcê şerî kenê. Bêvengîya mîyanneteweyî reyde Efrîn de terorêko rêxistinkerde û sîstematîk yeno kerdene.

Na bêvengîye sûcanê dewleta tirke meşrû kena, her ke şina îşxalê tirkan sûcanê pîlêran kenê. Îşxalkeranê tirkan gorê şehîdan ê kişta nêweşxaneyê Avrînî akerdî ke nê şerwanî xoverdayîşê vera îşxalî de şehîd bîyî. 3 serran ra dima îşxalê tirkan vano ke no gorêko komkî yo û xoverdayîşê Modernî û xoverdayîşê YPG-YPJyî reş keno.

Dokumentê Dezgehê Keyeyanê Şehîdan ê Efrînî û dokumentê Yewinanê Pawitişê Şarî xirabî munafiqîya sîyasetê tirkan eşkera kenê. Roniştoxê Efrînî yê ke nê şehîdî pê destê xo defin kerdî, îsbatê tewr pîlî yê sûc û terorê dewleta tirke yê. Dewleta tirke armanc kena ke warê mîyanneteweyî bixapîna.

Kerdişê terorî yê sîstematîkî û teberqanûnî kerdişê vera merdimîye yê. Ma rêxistinanê Neteweyan ê Yewbîyayeyan û rêxistinanê huqûqî yê mîyanneteweyîyan nê kerdişan ra mesuldar vînenê. Çunke vera binpaykerdişê erjanê fîrazan ê komelî û erjanê komelê kurdî qetî tewir nêmojnenê.''