DBPyî Kongreya Pêroyî ya 7ine ra ver Amed de kombîyayîşê şarî keno. Hemserekê DBPyî Çîgdeme Kiliçgun Uçar û Keskîn Bayindir, Hemserekê DEM Partî Tulaye Hatîmogullari û Tuncer Bakirhan zî tede xeylê kesî tewrê kombîyayîşî bîyî.

Tulaye Hatîmogullari kombîyayîş de qisey kerd û bale ante hêrişanê dewleta tirke yê vera Rojawanî ser. Tulaye vat: ''Erdê Rojawanî her roje beno şahîdê qirkerdişanê dewleta tirke û çeteyanê ci yê SMOyî.  Înanê ke hêvîya binkewtişê Kobanê kerdêne ê ancî geş bîyê. La Kobanê senî ke verê hêrişanê DAÎŞî de bin nêkewta, do ancî bi nêkewa. Seba Sûrîyeya newîye modelê çareserîye modelê Îdareyê Xoserî yo. Seba ke Îdareyo Xoser ê Rojawanî bişinasîyo ganî ma xîret bikerê.''

Tulaye vist vîrî ke heyetê înan Îmrali de Birêz Ocalanî de pêvînayîş kerdo û vat: ''Ez wazena ke hîrê noqtayê ke Birêz Ocalanî ma rê vato, nînan pare bikera. Birêz Ocalanî vato 'Ganî her kes serebûtê Sûrîye, Filîstînî nêzdî ra teqîb bikero. Hêzê emperyalîstî kayanê neweyan kay kenê. Coka ganî meseleya kurdan bêra çareserkerdene. Ganî haştîya rûmetêne bêra caardene.' Ma paştî danê nê qiseyan. 

Şarê kurdî qasê 40 serrî yo têkoşînî ra fek vera nêda. Eke ewro Rojawan de Îdareyo Xoser ronîyayo no serkewtişê kurdan o. Ma helanê tarîxîyan de yê. Nê helan de ma do bi hawayêkê pozîtîfî haştîye awan bikerê yan zî her ca do bibo sey Gazze. Ez venga eqlê dewlete dana ke wa berê Îmraliyî abilero; pêvînayîşêk bes nîyo. Berê Îmraliyî ganî bêrê akerdene û şerê azadîya Birêz Ocalanî bêrê caardene ke o bieşko seba haştîya Rojhelatê Mîyanênî bixebito.''