Komeleya Heqanê Merdiman (ÎHD) a Amedî seba ke cenazayê rojnamegeran Nazim Daştan û Cîhane Bîlgîn bîyara Vakurê Kurdîstanî muracat kerd. Şubeyê ÎHDyî yê Amedî hesabê xo yê Xî ser de pare kerd ke cewab nêdîya muracatê înan.

ÎHDyî vat: ''Keyeyanê Cîhane û Nazimî  seba ke cenazayan bigêrê muracatê ma kerd. Ma zî 24ê kanûna 2024î de muracatê Wezîrîya Karanê Zereyî û Komîsyonê Cigêrayîşê Heqanê Merdiman ê Meclîsî û 5ê çeleyî de zî muracatê Sersefîrîya Hewlêrî kerd. La hema nê dezgehan cewab nêda ma.

Heyetêko ke keyeyanê Cîhane û Nazimî, wekîlan, huqûqnasan û rojnamegeran ra yeno pê 6ê çeleyê 2025î de waşt ke derbazê Herêma Federale ya Kurdîstanî bibo û cenazayan bigêro. La heyet berê sînorî de, bi îdîaya ke cîhazê X-Rayî nêxebitîyenê ame astengkerdene û heyet Tirkîya ra vejîyo.

Sey ÎHDyî ma vanê ke heqê hemwelatîyan est o ke goreyê bawerî û kulturê xo bêrê definkerdene, dejanê merdimanê xo yê merdeyan biancê. Seba ke cenazayî bigêrîyê ma wazenê ke meqamanê eleqedaran de têbigêrê.''