Gazîya Kobanê Newale Egîd Koçer ajansê ma rê bi wesîleya Roja Kobanê ya Dinya ya 1ê Teşrîna Peyêne qala Xoverdayîşê Kobanê kerde.

Newale Egîd Koçer koyanê Botanî ra verê xo dana Kobanê û 15ê êlula 2014î de resena Kobanê. A panc mengan Kobanê de şer kena. Wextê Hemleya Girê Miştenûrî de 20ê çeleyê 2015î de qirix û sereyê xo ra birîndar bena.

Newale wina qala xoverdayîşî kerde: ''Koyanê Botanî de ma eşnawit ke DAÎŞî hêrişê Kobanê kerdo. Verî ke mi verê xo dabi koyan soz dabi keye û şarê xo ke ez do tim erkanê xo yê pawitişî bikera. Coka mi bire daye ke şora Kobanê. Pa embazan ma ver bi Kobanê kewtî rayîr. Wexto ke ma resayî Kobanê 50 embazan ra di tenî birîndar bibî. Ma mîyanê bombardumanan û hêrişanê dişmenî ra vîyartî şîyî Kobanê.

15ê êlule de saete 02.00 de ma resayî Kobanê. Roja bîne ma cade tewrê şerî bîyî. Ez Qulbe de wezîfedar bîya. O çax mi eşnawit ke dezayê mi Halît Kaçar (Memyan Botan) şehîd bîyo. O çax ê taburî de 50 embazî est bîyî. Nînan ra 47 tenî şehîd bîyî. Seba ke ez sereyê xo ra Miştenûr de birîndar bîya zaf çîyî mi vîr a şîyî. La hol yeno mi vîrî ke azadkerdişê Miştenûrî ra dima ma govendêka pîle girewtbî. Miştenûr de ez birîndar bîya. Tedawî ra dima zî 25ê kanûna 2015î de reyna agêraya Kobanê.

Cinîyan ê kurdan Xoverdayîşê Kobanê de bi nasnameyê YPJyî bala pêro dinya ante xo ser. Embazanê ma sey Arîne Mîrkan û Rêwane Kobanê mesajê xoverdayîşî da. Cinîyan xo ver da, şer kerd û bi rêxistinîya xo ser kewtî.

Roja Kobanê ya Dinya seba ke dinya barbarîya DAÎŞî ra ameya xelisnayene aferîyaya. La ewro vera Rojawanî hema zî hêriş û îşxal dewam kenê. Senî wextê Xoverdayîşê Kobanê de şaran paştî dabî Rojawanî ganî ewro zî vera hêrişan û îşxalî asta globale de seferberîye bêra îlankerdene.''