Sakîne Cansiz (Sara) ya ke 9ê çeleyê 2013î de Qirkerdişê Parisî de şehîd bîya, xo pey de têkoşînêko pîl verda. Aye Dêrsimî ra heta Rojawanê Kurdîstanî, koyanê Kurdîstanî ra heta Ewropa têkoşîn kerd û têkoşînê aye tesîrê xeylêk cinîyan kerd.

Cinîyanê Rojawanî Sûade Mistefa û Rewşene Reşîd ê ke Sara şinasnabî, derheqê Sakîne Cansiz de qisey kerd.

Sûad Mistefa û dadîya ci Rewşene 15ê tebaxa 1991î de Akademîya Şehîd Mahsum Korkmazî de Sakîne Cansiz dîye. Dayîke Suade 1982 de keyeyê xo gerîlayan rê akerd û mîyanê nê gerîlayan de Bêrîvane Agal zî est bîye. Gerîla Bêrîvane tim qala xoverdayîşê Zîndanê Amedî yê Sakîne Cansiz kerdêne.

Dayîke Sûade vat: ''15ê tebaxa 1991î de ma Akademîya Şehîd Mahsum Korkmazî de Sakîne dîye. O çax a newe Zîndanê Amedî ra vejîyabî. Ma yewbînî pers kerdî.  Aye vat ke zîndan de 40 rojan bêmabên îşkence dîyo. Ma 3 rojan pîya mendî. Aye xo bi felsefeya Rayber Apoyî perwerde kerdbî û teslîmîyet qetî qebul nêkerd. A seba pêro cinîyan sembola xoverdayîşî ya.

Embaze Sakîne Rojawan de zaf nêmende la zaf tesîrê Rojawanî kerd. Cuya aye ya têkoşînî seba cinîyan bîye rîpelêkê neweyî. A kurdan û pêro cinîyan rê bîye serkêş. Ma do tim aye yad bikerê û qetî aye xo vîr a nêkerê.''

Rewşene Reşît seba ke waya xo ya gerîla bivîna 1991 de şina Akademîya Mahsum Korkmazî û uca de Sakîne Cansize şinasnena. Rewşene vat: ''Embaze Sakîne bi coşêkê pîlî ma pêşwazî kerdî. A zîndanî ra newe vejîyabî. Vatêne Rojawanî kelecan dano aye. Hêrsê aye yê vera dişmenî çimanê ci ra eşkera bîyêne.

Têkoşînê embaze Sara hema zî hêz û rûmetî dano ma. Heta çilka peyêne ya gonîya xo ma do rêçê embaze Sara teqîb bikerê.''