Vervatoxa Çapemenîya Yewîyan Pawitişê Cinîyan (YPJ) Rûkene Cemal vizêr Ronahî Tvyî rê hêrişê dewleta tirke û çeteyanê ci yê vera Kantonê Minbicî erjnayî. 

Rûkene Cemal wina vat: ''Herêmanê Îdareyê Xoserî de bi teknîkanê şerî yê cîyayan cewabê hêrişan yeno dayene. Ma vera Tirkîya û çeteyanê ci teknîkê şerî yê neweyî fînayî dewre.Til Temir de ANKA ame wardayene. No zî nimûneyêke nêyî yo. Bi serran o pê nînan herêmanê ma de qirkerdişan kenê. Bi desan reyî pê nê çekan hêrişê embazanê ma kerd. Ma hinî eşkenê vera SÎHAyan taktîkanê neweyan bişuxulnê. Ma mîjdanê nê danê şarê xo.''

Rûkene Cemal bale ante ser ke nê 13 rojanê peyênan de hêrişê vera Kantonê Minbicî giranêr bîyî û vat: ''Bajarê xoverdayîşî Minbic de pêkewtişê giranî qewimîyenê. Tirkîyaya îşxalkera ke bi rojanê serkêşîya şerî kena wazena bajarî bifîno dest. La şervanê Meclîsê Leşkerî yê Minbicî bi rojan o destanan nuseno. Çeteyan verî sîvîlî hedef girewtî. Minbicî ser o bi desan teyarayê keşîfî gêrênê. Bi nînan şar yeno hedefgirewtene. Seba ke erdî ra nêeşkenê vera şervananê ma yê qehremanan aver şirê hewa ra hêriş kenê. Ewro nê hêrişî zêdîyayî. Qerqozaq û Teşrîn de pêkewtişî qewimîyayî. Wesayîto ke xeylê çeteyî bibî ame îmhakerdene. Wird cayan de zî şervanê QSDyî destan nusenê. Bi desan çeteyî ameyî kiştene.''

Rûkene Cemal ard ziwan ke xeberê îşxalkerdişê Minbicî raşt nîyê û nê vatî: ''Minbic de heme mewzîyan de cewabê hêrişan yeno dayene. Hukmatê Şamî 13 rojî de vera hêrişan rijîya la Minbic 13 rojî yo nêkewt. Şervanê QSDyî destanê pîlî nusenê. Bajar de şero giran est o. Ma do heta peynî bi ruhê fedayîyî xover bidê. Her hetê bajarî de hêrişî est ê la vera nê zî xoverdayîş est o. Her ca de derbeyê girdî dîyenê çeteyan ro. Vîdeoyê ke ameyî parekerdene înan de zî yeno vînayene ke şervanê QSDyî senî şer  kenê. Her ca de şervanî xover danê.  Kuçeyanê Minbic û dewanê ci de oxverdayîşo tarîxî est o. Hêrişî çend dewam kenê wa bikerî şervanê QSDyî do nê hêrişan bişiknê.''