Vervatoxê YPGyî Nûrî Mehmûdî derheqê tehdîtanê neweyan ê Serekkomarê Tirkîya Recep Tayyip Erdoganî yê semedê hîrakerdişê waranê ke îşal kerdî de cewab da persanê ANFyî.

Nûrî Mehmûdî vist vîrî ke nê tehdîtê Erdoganî çîyê neweyî nîyê û vat: ''Xora eşkera îlan bikerê, mekerê hema hema her roje vera Şehba, Til Rifat, Serêkanîye, Til Temir, Eyn Îsa û bejrayîrê M4î dewam kenê. Vera herême xora hêrişî tim est ê. Pê îlankerdişê nê wazenê nê hêrişan xurtêr bikerê. Rejîmê AKP-MHPyî û Erdogan artêşa tirke û çeteyanê ke  grûbanê  sey DAÎŞ û El Kaîde ra mendê, şuxulnenê. Rewşa têgêrayîşî û kombîyayîşê înan est a. Cehdkerdişê hêrişê vera Rojawanî est o. Erdogan wextêk o warê dîplomatîk û medya de xora vano ê peyê hêrişê winayênî de yê.  Rojane bi droneyan vera hemwelatîyan û endamanê ma hêrişî yenê kerdene. Kenê ke hêrişê îşxalî  yê xurtêr bidê destpêkerdene. Semedê nê zî amadekarîya înan û îlankerdişê hêrişî eynî proses de yê. Ma îlanê şerî yê Erdoganî sey tehlukeyê pîlî vînenê û goreyê ci genê dest.''

Mehmûdî wina dewa kerd: ''Nê hêrişê ke yenê kerdene heme pêkerdişê mabênê Rûsya-Amerîka-Koalîsyonê Mîyanneteweyî, ma û Tirkîya binpay kenê. Nê hêzî hêzê garantorî yê nê pêkerdişî yê. Vera herêmanê.Til Temir, Eyn Îsa, bejrayîrê M4î, Til Rifat, Şehba, Qamişlo, Dêrik û Kobanê hêrişê top, tank, teyara û çeteyan qet nêvindet. Heme dinya ganî bizano ke artêşa tirke ya ke bi talîmatê Erdoganî têgêrena nê pêkerdişî binpay kena. Ganî hêzê mîyanneteweyî,  Amerîka û Rûsya berpirsîyarîya xo bîyarê ca. Eke hewce keno wa Tirkîya ra vajê vinde.''

Nûrî Mehmûdî  bale antê zêdbîyayîşê hêrişanê DAÎŞî ser û vat: ''Pîya bi hêrişanê Tirkîya hêrişê DAÎŞî zî aver şinê. DAÎŞ newe ra bêno hêzdar û têgêrayîşê xo zêdîneno. Tehlukeyê terorî newe ra vejîyano werte.  Dinya ganî nê sero vindero. Wa tekîlîya Erdogan û DAÎŞî reyna bêro destgirewtene. Bi hezaran îspatî est ê. Hêrişê vera Hesekê mîsalê nê bi. Nika Kampa Holî de tehluleyê newe ra hêrişê DAÎŞî est o. Nê pabesteyê yewbînan ê. Ganî heme dinya nînan bivîno.  Erdogan eynî wextî de Iraq de zî hêriş keno. Îqtîdar seba kê problemanê mîyanê Tirkîya binimno şerî vîjneno. Teberê şerî de çareserîyêka înan çîn a. Vanê tehluke est o la Rojawan çirey tehlku nêbi. Wa şarê Tirkîya na raştîye bivînê.''

Mehmûdî vat: ''Seke yeno zanayene rejîmê Sûrîye bi mîyançîya Rûsya herême de yo. Rûsya û Amerîka garantorê pêkerdişê ke badê şerê Serêkanîyê-Girê Sipî ame kerdene, yê. Bêşik înan reyde pêvînayîşî ameyî kerdene. Nê hêrişî yenê qiseykerdene. Heta nika vera hêrişanê Tirkîya çîyêko zelal nêvejîya werte. Hêzê garantorî ganî wezîfeyê xo bîyarê ca.  Erdogan bi atêşêka NATOyî vera herêmanê ma hêriş keno. Nê hêrişî vera çareserî gêne.  Kemero ke Erdogan galê ci keno eslê xo de warê demokrasîyî yê. Qalê herêmanê kurdan keno. Erdogan kurdan û demokrasî ra terseno coka wazeno modelê neweyî yo ke Sûrîye de serkêşîye keno, îmha bikero. Wazeno herêmanê kurdan bifîno dest ke  hêvîya şarî bişikno û şorişî ra bifîno dûrî

Vervatoxê YPGyî Nûrî Mehmûdî vat: Sere de dezgehê ma yê pawitişî YPG-YPJ û QSDyî heme dezgehê ma prosesê muhîmî ra ravêrtî. Bitaybetî badê şerê Efrîn, Serêkanîye û Girê Sipî semedê pawitişê xo û ercanê şorişê tecrubeyê pîlî kerdî pêser û rêxistin kerdî. Rewşa ke Efrîn, Serêkanîye û Girê Sipî de bîyî do reyna mebo. Eke hêriş bibo ma do cade cewabê ci bidê. Şarê ma zî ganî nê tehdîtanê îşxalî ser o vindero û goreyê ci xo rêxistin bikero.''