Vervatoxê YPGyî Nûrî Mehmûdî ke ajansê xeberan ê ANHA rê qisey kerd, ard ziwan ke tay hetî vera YPGyî şerê taybetî yê leyminî rayra benê.

Mehmûdî vat: ''Seba ke Vakurû Rojhilatê Sûrîye mucadeleyê şorişgêrî de serkêşîye kenê vera şaranê Rojawanî polîtîkaya reşa plankerde yena rayraberdene. Yeno waştene ke mucadeleyo şiroşgêr bêro qedînayene û Rojawanî bêro bêîtîbarkerdene. Qicî ameyoxê komelî yê. Na cografya de cîyakerdişê qican goreyê netew, bawerî û qewmî mumkun nîyo. Heme dezgehê Rojawanî qican pawenê. Qicî çarçewa ronayîşê komelê ehleqî de yenê perwerdekerdene. Qet yew dezgehê leşkerî yê Rojawanî de 18 serran ra qijêr çew çîn o. Qicê ke yenê cayê ma, ma înan şawenê  hetê Îdareyê Xoserî. Ê zî semedê qican cayo tewr hole amade kenê û înan ûca de ca kenê ke wa perwerde bivînê. Êyê ke sîstemê demokratîkî yê Rojawanî nêwazenê, nêşeken pê reşkerdişê destfînayîşê 11 hezar şehîdan biresê waştişê xo. Xora êyê ke polîtîkaya reşkerdişî rayra benê ê bi xo qican şuxulnenê. Cayê ke hetê dewleta tirke ra ameyî îşxalkerdene de vera qican kayê leyminî yenê kaykerdene ke ganî keyeyî hîşyar bê.''