Pê înîsîyatîfê QSDyî mabênê Partîya Yewîya Demokratîke (PYD) û ENKSî de pêvînayîşê seba yewîya neteweyîye dewam kenê. Çimdaro sîyasî Welîd Çolîyî nê pêvînayîşî seba ANFyî ercaneyî.

Welîd Çolîyî vat: ''Verê cû zî herême de seba yewîya neteweyîye pêvînayîşî ameybîkerdene. La pêvînayîşê nikayênî wayîrê atmosferêkê pozîtîfî yê. Îran, DYA, Rûsya, Tirkîya pêro Rojawanî ra ecîz ê. Kuçeyê kurdan hînî çareserî wazenê. Ganî partîyê kurdan ney bivînê û goreyê ci têbigêrê. Mesela pevînayîşanê verênan de ENKSî vatbi ganî hêzêko çimdar estbo. Nika hêzê çimdarî zî estê. Dewleta tirke xîret kena ke nê têgêrayîşan asteng bikera û coka ganî her kes hîşyar bibo.  Dewleta tirke xîret kena ke alternatîfêkê ENKSî bivîna. Seba ney cigêrayîş keno.

Wa nêro vîrkerdene ke muxalefetê nikayênî yê Sûrîye de rêxistinêka kurdan zî ca nêgêna. Rewşa Efrîn, Serêkanîyê û Girê Sipî verê çiman de ya. Eke kurdî bieşkê bibê yew û muxalefet de ca bigêrê tay vurnayîşî do biqewimîyê.''