Bi seyan wendekaranê unîversîteya Kobanê seba paştîdayîşê serewedartişê ‘‘Jin, Jiyan, Azadî’’ (Cinî, Cuye, Azadî) yê Rojhelatê Kurdistanî û yê Îranî rayşîyayîşêko gird viraşt. Rayşîyayîş Unîversîteya Kobanê ra dest pêkerd û heta qada Jina Azad (Cinîya Azade) dewam kerd.  Wendekaran bi slogananê ‘‘JIN, JIYAN, AZADÎ’’ (Cinî, Cuye, Azadî) û ‘‘ŞEHÎD NAMIRIN’’ (Şehîdî nêmirenê) ray şîyê.

Deqayêk rêzgirewtişî ra dima, wendekara Unîversîteya Kobanê, Rovîn Tenî îzahatêk da. Îzahatî de ame eşkerakerdene ke 121 rojî yo ke Rojhelatê Kurdistanî û Îran de bi rayberîya cinî û ciwanan serewedartiş dewam keno. Û wina ame vatene: ‘‘No serewedartiş bi qetilkerdişê Jîna Emînî dest pêkerd. Cinî û şar hemverê ney de bi şîarê ‘‘Jin, Jiyan, Azadî’’ sere wederna û nê serewedartişî heme cayê Rojhelatê Kurdistanî û Îranî ra vila bîyî.’’

Dewamê îzahatî de ame eşkera kerdene ke heta nika bi seyan cinî û şar ameyê qetil kerdene, bi hezaran kesî ameyê tepîştene û ameyê dardekerdene û wina vajîya: ‘‘Şar fek têkoşînê xo ra nêverda. Bihezaran wendakarî azadîye wazenê. Serewedartişê ‘‘Jin, Jiyan, Azadî’’ seba pêroyê cinî û komelan o. Ma wendakarî û cinîyê ciwanî nê xoverdayîşê seba xo esas gênê. Ma nê serewedartişî silam kenê û ma eşkera kenê ke ma zî şima reyde yê.’’