13 hezar û 610 wendekarê Efrîn û Şehbayijî keye û mektebanê ke rijîyayê û dima ra ameyê tamîrkerdene de perwerdeyê xo domnenê.Wendekarî ezmê xo yê perwerdeyî bi nê hawayî ramojnenê û hemverê îşxalkarîya dewleta tirkî de ke bi polîtîkayanê xo şarê Efrînî ser o tirkbîyayîşî ferz kena vindenê.

Dima ke dewleta tirkî hêrişê qirkerdişî Efrînî ser o viraştî şarê Efrînî ravêrt bi Şehba û Komîteya Perwerdeyî ya Cimatê Demokratîkî (KPC-D) peynîya menga Tebaxe de seba ke wendekarî bieşkê perwerdeyê xo bidomnê dest bi xebatan kerdî. Xebatî 15ê Êlule de ameyî temamkerdene û 81 mekteban de perwerde ame destpêkerdene.

Nînan ra 64 mektebê ewilênî yê, 10 mektebê mîyanênî û 7 zî mekdebê hadreyî yê. Nê mekteban de pêro pîya 977 malimî gure kenê.

Perwerdeyo Bi Zafziwanî

Her hîrê merheleyanê mûsayîşî (ewilên, mîyanên û hadreyî) de zî wendekarî dersanê matematîk, îlimê fenî, tarîx, coxrafya, fîzîk, kîmya, exlaq-kultur û muzîkî gênê. Sosyolojî û jîneolojî zî tenya seba wendekaranê hadreyîye yenê dayene. Mekteban de perwerdeyo bi zafziwanî yeno esasgirewtene û perwerde bi ziwananê kurdkî, erebkî, îngilîzkî û franskî yo.

Rîyê pêkewtişanê herême ra xeylî banê mekteban rijîyabî û bibî xirabe. Na yewe ra KPC-Dyî seba wendekaran tayê keyeyî açarnayî bi mekteban.

Komîteyê Wendekaran

Hetêna ra Komîteyê Wendekaran ê mektebanê mîyanênan û hadreyîyan zî seba teqîbê halê wendekaran xebetênê.

Wendekara bi nameyê Heyfa Haşime vat: “Çîyo muhîm o yo ke ma bieşkê çîyan bimûsê. Ca yan zî mekan muhîm nêyo. Binê darêk de bo zî ma do perwerdeyê xo rê dewam bikerê. Ma dersanê xo kitabanê ke bi ziwanê maya ma ameyê hadrekerdene ra gênê. Bi nê hawayî ma hemverê qirkerdişê kulturkîyî yê îşxalkarîya tirkî vindenê.”

Feyza El-Salime ke Heleb ra rîyê pêkewtişan ra koçê Efrînî kerdo, la dima ra zî rîyê şerê Efrînî ra mecbûr menda ke bêro Şehba vat: “Ma dersa ziwanê erebkî gênê. Ma matematîk zî gênê. Malimê ma hetkarîya ma kenê.”