Kantonê Efrîn-Şehba û Heleb de binê hêrişanê dewleta tirke û ambargoyê hukmatê Şamî de 14 hezar û 793 wendekarî perwerde vînenê. Kanton de 61 dibistanî est ê.

Hemserekê Heyetê Perwerde û Banderîye yê Efrîn-Şehba Fadil Çawîşî derheqê sîstemê perwerdeyî de ANFyî rê qisey kerd.

Çawîşî ard ziwan ke îşxalê Efrînî ra dima Kampa Berxwedanî de perwerde dewam keno û vat: ''Kampa Berxwedanî de 10 xeymî est ê ke tede perwerde dîyeno. Kantonê Efrîn-Şehba de bi hîrê ziwanan kurdkî, erebkî û îngilîzkî perwerde yeno dayene.''

Çawîşî pare kerd ke Enstîtuyê Vîyane Amade 2013 de Efrîn amebi awankerdene û 2019 ra bata kanton de karê perwerdeyî rê dewam keno. Çawîşî vat: ''Enstîtu de mamostayî yenê perwerdekerdene. Ma enstîtu de giranîye danê Edebîyat û Ziwanê Kurdkî. Ancî dersê ma yê erebkî, matematîk, tarîx û fîzîkî ûsn zî est ê. Nika enstîtu de 179 wendekarî est ê.''

Fadil Çawîşî dîyar kerd ke ê kenê ke pêro meseleyanê warê perwerdeyî çareser bikerê û vat: ''Hûmara dibistanan qîm nêkenê. Bînayanê ma hêrişanê dewleta tirke de zî zerar dî. Hewceyê ma bi dibistananê neweyan est ê. Hetê materyalan ra zî rîyê ambargoyî ra kêmasîyê ma est ê. Ma do pêro şertan kombîyayîşê xo yê hamnanî de nîqaş bikerê.''