WHOyo ke derzîna vera Korona bi hawayêkê têdûştî temamîya Sûrîye de vila keno hêverî derzîne daye herêmanê ke binê îşxalê Tirkîya de yê. Eşkera bi ke WHOyî rixmê sozê xo derzîne nêdaye herêmanê Îdareyê Xoserî.
Rêxistina Weşîye ya Dinya (WHO) seba derzînanê vîrusê Korona pê nameyê Xîretê COVAXî dest pê kampanyayêke kerdbi. Kampanya bi taybetî seba herêmanê şerî dîyabî destpêkerdene. WHOyî na çarçewe de soz dani Îdareyê Xoserî de heta menga gulane 90 hezar derzînan bierşawo.
Îdareyê Xoserî zî planê xo kerd ke nê derzînan destpêk de piro bido merdimanê kokiman û xebatkaranê weşîye. Labelê goreyê zanayîşan heta nika tay derzînî resayî herêmanê Îdareyê Xoserî. Goreyê agahîyanê ke Îdareyê Xoserî dayî ajansanê mîyanneteweyîyan heta nika nêzdîyê 700 derzînî erşawîyayî la pêro zî nêweşxaneyêkê Qamişloyî rê erşawîyayî ke no nêweşxane pabesteyê rejîmê Şamî yo.
Nêweşxaneyê Qamişloyî ra berî derzînî nêresayî nêweşxaneyanê Rojawanî û herêmanê Îdareyê Xoserî. WHOyî hewteyê vîyarteyî de 203 hezar derzînî dayî herêmanê ke binê îşxalê dewleyta tirke de yê.
Rêxistina Doktoran ê Sînornenasan (MSF) WHO rexne kerd ke derzînî bi hawayêkê têdûştî vila nêkerdî. MSFyî eşkera kerd ke eşkerayîye û hûmaranê fermîyan ra zêdêr merdimî nêeşkenê derzîn û testan bivisnê destî.
